ElbasaniPlus Lajmet më të fundit nga Elbasani dhe jo vetëm.
Mbrëmjen e së martës, më 13 maj, skena e gjysmëfinales së parë të Eurovision 2025 në Bazel u përfshi nga flakët, në kuptimin e mirëfilltë dhe figurativ, me paraqitjen e Shqipërisë.
Kështu shkruan media greke Protothema në një artikull dedikuar performacës së Shkodrës ‘Elektronike’.
Shkodra Elektronike, dyshja muzikore ekscentrike, performoi këngën “Zjerm” (“Zjarr”), duke rrëmbyer vëmendjen e shikuesve.
Prania në skenë kombinoi minimalizmin elektronik me referenca të forta ndaj traditës folklorike shqiptare.
Këngëtarja Beatriçe Gjergji doli në skenë e veshur me një version modern të një kostumi tradicional.
Krahas saj, producenti Kolë Laca koordinoi ritmet elektronike që “lidheshin” në mënyrë të përkryer me motivet ballkanike.
Përdorimi i ndriçimit të kuq intensiv, tymit dhe efekteve dinamike vokale, të kombinuara me koreografinë e thjeshtë por të menaxhuar në skenë, krijuan një përvojë të veçantë që shkëputej nga rutina e zakonshme e Eurovisionit.
Publiku në stadium e duartrokiti ngrohtësisht performancën, ndërsa ‘Zjerm’ u bë shpejt një trend në mediat sociale.
Kënga, e cila ishte pëlqyer tashmë në Festivalin e Këngës, ku fitoi vendin e parë, mbetet tërësisht në gjuhën shqipe, e cila, siç thanë edhe vetë artistët, “ishte një zgjedhje e vetëdijshme, për të mos humbur shpirtin e veprës ”.
