Sarajevë-Partitë e Gjelbra të Ballkanit të alarmuara nga katastrofa mjedisore

Në Sarajevë është nënshkruar këtë fundjavë një deklaratë e rëndësishme për krijimin e një Platforme Bashkëpunimi ndërmjet Partive të Gjelbra të Ballkanit Perëndimor.

Një nga nënshkruesit e shumtë të kësaj marrëveshje ishte edhe Indrit Abdiaj nga Partia e Gjelbër e Shqipërisë. Në këtë Deklaratë të firmosur nga Partitë e Gjelbra thuhet se duke marrë parasysh sfidat e përbashkëta në lidhje me krizën klimatike, ndotjen e mjedisit dhe shkatërrimin e biodiversitetit do të bëhet gjithçka për të minimizuar pasojat katastrofike.

Partitë e Gjelbra janë shprehur tepër të alarmuara nga situata kritike mjedisore në Rajonin e Ballkanit,Eurooës dhe kudo në botë dhe përgjegjëse sipas tyre janë qeveritë .Aktualisht është koha e domosdoshmërisë së “Green Just Transition” nga energjia fosile në energji të rinovueshme.

Ashtu si korrupsioni dhe krimi i organizuar edhe ndotja i tejkalon kufijtë e vendeve respektive dhe është një nga kërcënimet më të mëdha për demokracinë dhe mirëqenien e qytetarëve. Në kushtet e një situate kritike mjedisore, Partitë e Gjelbra nga rajoni i Ballkanit Perëndimor kanë vendosur të krijojnë një platformë operative dhe funksionale për bashkëpunim për të komunikuar sfidat individuale dhe të përbashkëta në lidhje me çështjet e politikave të brendshme dhe rajonale të Ballkanit Perëndimor, si dhe për të shfrytëzuar mundësinë për të përshpejtuar procesin e integrimit evropian të rajonit.

Partitë e Gjelbra kanë rënë dakord të organizojnë aksione të përbashkëta së bashku me aktivistë të tjerë që synojnë mbrojtjen e mjedisit, burimeve natyrore dhe të drejtave të njeriut të të gjithë qytetarëve ballkanas dhe kudo në europë për të siguruar dhe mbrojtur ajrin, ujin dhe tokën e pastër si edhe të edukojnë qytetarët dhe të gjejnë zgjidhje për uljen e varfërisë dhe sigurimin e jetesës së denjë përmes pagave dhe pensioneve adekuate.

Ndërkohë Partitë e Gjelbra synojnë të ndihmojnë në forcimin e modelit të vetëqeverisjes lokale për të pasur ndikim më të drejtpërdrejtë në mjedis dhe mbrojtjen e të drejtave themelore të qytetarëve si edhe të
të marrin përgjegjësinë për të diskutuar më tej modelet dhe strukturën e kësaj platforme që duhet të krijohet në muajt në vijim dhe procesi të rezultojë në formimin e qëllimeve realiste dhe ambicioze për një veprim të përbashkët.

Struktura e kësaj platforme të Gjelbër dhe procedurat e shkruara dhe të miratuara do të përcaktojnë rrugën e mëtejshme drejt të ardhmes më të gjelbër, më të drejtë dhe më të sigurt për rajonin e Ballkanit .