ElbasaniPlus Lajmet më të fundit nga Elbasani dhe jo vetëm.
Në Elbasan u zhvillua eventi i parë prezantues i projektit V-ROADS, pjesë e programit Erasmus+, i bashkëfinancuar nga Bashkimi Europian (Project No: 101242604), me fokus zhvillimin e aftësive në sektorin e turizmit.
Aktiviteti mblodhi përfaqësues nga institucione publike, universitete, biznese dhe organizata të shoqërisë civile, të cilët diskutuan mbi sfidat reale të tregut të punës dhe nevojën për përshtatjen e aftësive me kërkesat e sektorit të turizmit.
Në takim morën pjesë përfaqësues nga Bashkia dhe Prefektura e Elbasanit, si dhe nga universitete të rëndësishme si Universiteti Aleksandër Xhuvani, Universiteti i Tiranës dhe Universiteti i Shkodrës, së bashku me përfaqësues të bizneseve në turizëm dhe organizata joqeveritare.
Theksi te aftësitë që mungojnë në treg
Diskutimet u fokusuan në mungesën e aftësive konkrete në sektorin e turizmit, transformimin digjital dhe nevojën për standarde profesionale më të larta, sidomos në turizmin natyror dhe shërbimet ndaj klientit.
Projekti V-ROADS synon të adresojë këto sfida përmes zhvillimit të trajnimeve të shkurtra dhe praktike, të njohura si mikro-kredenciale, të cilat lidhen drejtpërdrejt me tregun e punës.
Krenar Xhemali: Sistemi duhet të përshtatet me realitetin
Drejtori i Qendra e Formimit Profesional Publik Elbasan, Krenar Xhemali, theksoi se sistemi i formimit profesional në Shqipëri ka nevojë për më shumë fleksibilitet dhe lidhje direkte me biznesin.
Sipas tij, një nga sfidat kryesore mbetet përshtatja e programeve të trajnimit me kërkesat reale të tregut, si dhe përfshirja më aktive e sektorit privat në procesin e formimit.
Ai nënvizoi se projektet europiane si V-ROADS krijojnë mundësi konkrete për modernizimin e sistemit dhe për rritjen e punësimit, veçanërisht në sektorin e turizmit.
Një hap drejt trajnimeve të reja në turizëm
Në vijim të projektit do të realizohet një analizë e detajuar e boshllëqeve në aftësi dhe do të zhvillohen kurse pilot për të rinjtë dhe profesionistët e sektorit.
Pjesëmarrësit u ftuan të kontribuojnë në këtë proces dhe të bëhen pjesë e iniciativave që synojnë të përmirësojnë cilësinë e trajnimit dhe punësimit në turizëm.
📌 Projekti V-ROADS synon të ndërtojë një lidhje më të fortë mes arsimit profesional dhe tregut të punës, duke e vendosur Shqipërinë në një rrugë më të qëndrueshme zhvillimi në sektorin e turizmit.
