Zhvillohet “Maratona Skampa” në Elbasan/ 1500 vrapues nga 35 shtete përçojnë mesazhe për sportin dhe shëndetin

Elbasani mirëpriti ditën e djeshme Maratonën Skampa, një nga ngjarjet më të mëdha sportive të vitit, ku morën pjesë rreth 1500 vrapues nga 35 shtete të ndryshme. Kjo maratonë ndërkombëtare, e organizuar për herë të dytë, nuk ishte thjesht një garë atletike, por një mesazh i fuqishëm për një jetë më të shëndetshme dhe aktive.

Kryetari i Bashkisë Elbasan, z. Gledian Llatja, falënderoi të gjithë pjesëmarrësit, duke theksuar rëndësinë e aktiviteteve sportive për të rinjtë dhe komunitetin. “Sporti nuk është thjesht konkurrencë, por një mënyrë për të përmirësuar cilësinë e jetës. Maratona Skampa është një shembull i shkëlqyer i përkushtimit tonë për të promovuar një stil jete të shëndetshëm,” tha ai.

Znj. Ermira Urupi, Kryetare e Këshillit të Qarkut, theksoi gjithashtu se “jeta është një garë, dhe ne duhet të garojmë për të marrë të mirat e saj.” Ajo vlerësoi mbështetjen e dhënë nga institucione të ndryshme dhe përpjekjet e klubit sportiv për ta bërë këtë maratonë një realitet të suksesshëm në Elbasan.

Maratona përfshiu gara në distanca prej 5 km, 10 km dhe 21 km, duke përçuar mesazhe të fuqishme për rëndësinë e një jetese aktive dhe promovimin e turizmit në qytet. Për të dytin vit radhas, kjo ngjarje ka sjellë një intensitet të veçantë, duke përforcuar imazhin e Elbasanit si një qytet që mbështet sportin dhe një stil jete të shëndetshëm.