Vjen lajmi i shumëpritur për shqiptarët, Kim: Nga 1 prilli vizat turistike për në SHBA nuk do të jenë më 3-vjeçare, por…

Në kohën kur Shqipëria dhe SHBA festojnë 100 vjetorin e marrëdhënie diplomatike, Ambasadorja e SHBA në vendin tonë,  Yuri Kim ndan një lajm shumë të rëndësishëm për qytetarët shqiptarë.

Në një status të shpërndarë nga ambasada e SHBA,  Kim bën me dije se duke filluar nga 1 prilli, vizat turistike 3-vjeçare do të bëhen 10-vjeçare dhe do ta bëjnë më të lehtë për shqiptarët të cilët duan të vizitojnë miqtë dhe familjen në Shtetet e Bashkuara.

“Ndërsa ne festojmë 100 vjet marrëdhënie midis Shteteve të Bashkuara dhe Shqipërisë, kam kënaqësinë të ndaj me ju një lajm të mrekullueshëm që besoj do t’i sjellë amerikanët dhe shqiptarët akoma më afër së bashku. Çdo vit, shumë e më shumë shqiptarë po vizitojnë Shtetet e Bashkuara ashtu si gjithnjë e më shumë amerikanë po vizitojnë Shqipërinë. Tashmë do ta bëjmë më të lehtë për shqiptarët të cilët duan të vizitojnë miqtë dhe familjen në Amerikë të shohin vendet tona dhe të ndërtojnë marrëdhënie biznesi. Duke filluar nga 1 prilli, vlefshmëria për një vizë të re turistike apo biznesi do të zgjasë nga tre deri në dhjetë vjet. Kjo do të thotë se nëse jeni një qytetar shqiptar që merr një vizë turistike apo biznesi në 1 prill ose më pas, viza juaj do të jetë e vlefshme për dhjetë vjet, jo vetëm tre. Ju do të keni mundësi të shkoni dhe të vini në Shtetet e Bashkuara në bazë të ligjeve dhe rregullave përkatëse, pa pasur nevojë që të rinovoni vizën tuaj deri në 2032. Vendimi i Shteteve të Bashkuara për të zgjatur vlefshmërinë e vizës në dhjetë vjet pasqyron faktin që shqiptarët gjithnjë e më shumë po ndjekin rregullat kur vizitojnë Shtete e Bashkuara. Shpresoj që të gjejmë akoma dhe më shumë mënyra për të afruar shqiptarët dhe amerikanët së bashku. Ne presim me kënaqësi që t’ju mirëpresim në Shtete e Bashkuara dhe presim me kënaqësi edhe 100 vite të tjera si miq”, tha ambasadorja në videon e shpërndarë nga ambasada e SHBA./Opinion.al