Bindi Nuredin Dumanin të rrëfehet/ Prokurori Altin Dumani promovohet si numri dy i SPAK

Prokurori Altin Dumani është zgjedhur zv.drejtuesi i Prokurorisë së Posaçme, SPAK.

Lajmi u njoftua nga prokuroria e Posaçme e cila tha se caktimi i Altin Dumanit në funksionin e Zv. Drejtuesit të Prokurorisë së Posaçme ka një afat dy vjeçar.

“Drejtuesi Prokurorisë Posaçme fillimisht mori mendimin e prokurorëve të cilët në mënyrë unanime propozuan që si zv. Drejtues të rizgjidhej prokurori Altin Dumani. Në vijim Drejtuesi i Prokurorisë Posaçme vendosi caktimin e zotit Altin Dumani në funksionin e Zv. Drejtuesit të Prokurorisë së Posaçme për një afat dy vjeçar” thuhet në njoftimin e SPAK.

Nga Gërdeci, te rrëfimi i Altin Dumanit

Dumani është një nga prokurorët që ka pasur në dorë gjykimin e 29 të pandehurve të Gërdecit mes të cilëve kërkoi 3 dënime të përjetshme për tragjedinë e 15 marsit 2008.

Po ashtu, ai udhëhoqi operacionin që çoi në pranga 13 persona, mes të cilëve edhe gjyqtaren e Gjykatës së Krujes Enkeleda Hoxha që lironte të fortët nga qelia.

Por së fundmi emri i tij është përmendur edhe në rrëfimin e vrasësit me pagesë, Nuredin Dumani. Sipas mediave, ai ishte prokurori që bindi Nuredin Dumanin të rrëfehej për krimet e tij të shumta në bashkëpunim me një grup kriminal që vepronte në Tiranë, Durrës dhe Elbasan.

Karriera

Dumani vjen nga radhët e Prokurorisë së Apelit. Ai është lindur në Shupenzë të Dibrës. Ai është një nga prokurorët që drejtoi i pari njësinë Task Forcë, ngritur vite më parë për të luftuar krimin e jakave të bardha. Ka një karrierë prej 23 vitesh si prokuror. Në mars të vitit 1999, ka shkelur për herë të parë në prokurori, me detyrë në Sarandë.

Ai u bë drejtues prokurorie për herë të parë në Tropojë, në vitin 2000, një post sipas Dumanit që u refuzua nga shumë të tjerë për shkak të çështjeve problematike atje.

Kur u pyet se pse vendosi që të jetë pjesë e SPAK para dy vitesh, Dumani u përgjigj duke thënë se ka lënë mënjënanë komoditetin e prokurorisë së apelit dhe do t’i përkushtohet luftës ndaj krimit. “Lufta ndaj krimit është më prioritare se komoditeti zyrës” tha ai.

Gjatë vetingut, Dumani mori edhe përgëzimet e të dërguarit të Operacionit Ndërkombëtar të Monitorimit, Theo Jacobs, ditën që doli përpara Komisionit të Pavarur të Kualifikimit. “Kam marrë pjesë në 25 çështje dhe kjo është hera e parë që s’kam asnjë pyetje. Zoti Dumani qenka me fat”, u shpreh Jacobs.

Më herët ai kishte aplikuar për të qenë në krye të Prokurorisë së Posaçme kundër Korrupsionit dhe Krimit të Organizuar (SPAK). Gjatë intervistimit, ai u shpreh “Prokuroria e Posaçme do të bëjë të mundur që në Shqipëri ku cilido që kryen një krim ndëshkohet pavarësisht pozicionit që mban të ndëshkohet”.