ElbasaniPlus Lajmet më të fundit nga Elbasani dhe jo vetëm.
Nga Fatmir Popja
Bashkia e Librazhdit ka hapur zyrtarisht sezonin e turistik duke organizuar një manifestim të veçantë në stadiumin e qytetit. Ky aktivitet u shoqërua me një atmosferë festive ku morën pjesë qytetarë të Librazhdit dhe operatorë të shumtë turistikë të cilët organizojnë guida turistike në zonat malore të Librazhdit.
Këta operatorë turistikë luajnë një rol të rëndësishëm në zhvillimin e turizmit malor në këtë rajon me destinacione të shumta. Ky sezon turistik pritet të sjellë një rritje të jashtëzakonshme të numrit të vizitorëve duke pasur parasysh interesin e shtuar që ka ardhur nga turistët e huaj dhe vendasit të cilët e preferojnë Librazhdin për të eksploruar bukuritë e shumta natyrore të tij dhe veçanërisht turizmin malor.
Kryetari i Bashkisë së Librazhdit, Mariglen Disha gjatë fjalës përshëndetëse me rastin e çeljes së sezonit turistik theksoi se çdo vit ka një rritje të numrit të turistëve vendas e të huaj që vizitojnë këtë zonë. Sipas tij vetëm gjatë vitit të kaluar në bashkinë e Librazhdit numri i vizitorëve arriti në rreth 600 mijë, një shifër kjo që tregon për interesin gjithnjë e më të madh që ka qyteti dhe sidomos zonat malore për turizmin. Kryebashkiaku Disha theksoi gjithashtu se Bashkia e Librazhdit gjatë dy viteve të fundit ka investuar në projekte të shumta, si për promovimin e turizmit malor, ashtu edhe për mbështetje financiare për operatorët turistikë. “Ne jemi munduar që të sjellim projekte që mbështesin zhvillimin e turizmit malor në Librazhd si dhe të ofrojmë ndihmën tonë financiare për ata që operojnë në këtë fushë,” – u shpreh Disha.
Një tjetër faktor që ka ndihmuar në rritjen e numrit të turistëve është investimi në infrastrukturën rrugore që ka lehtësuar qasjen në zonat malore të Librazhdit. Sipas kryetarit të bashkisë Mariglen Disha , këto investime janë të rëndësishme për të sjellë turistët më afër dhe për t’i mundësuar atyre një eksperiencë sa më komode. “Padyshim infrastruktura është një ndër faktorët kryesorë që ka kontribuar në rritjen e numrit të turistëve dhe ne do të vazhdojmë të investojmë në këtë drejtim”, tha Kryebashkiaku Disha.
Zonat më të frekuentuara nga turistët mbeten ato të Fush Studën ,Parku Kombëtar Shebenik,Xhyra,DardhaPolisi ,Darëzi ,Qarrishta etj të cilat janë destinacione të njohura për bukuritë natyrore dhe mundësitë që ofrojnë për aktivitete të ndryshme turistike. Bashkia e Librazhdit ka ofruar shërbime të shumta për të mbështetur këtë zonë duke përfshirë përmirësime në infrastrukturë, mundësi akomodimi dhe përkujdesje shëndetësore për të garantuar një qëndrim të rehatshëm dhe të sigurt për çdo vizitor. Kryebashkiaku Mariglen Disha theksoi se prioritet i Bashkisë është që të ofrojë një përvojë sa më komode dhe cilësore për të gjithë turistët, duke siguruar kështu një turizëm të qëndrueshëm dhe të zhvilluar.
Pjesëmarrës në aktivitetin e hapjes së sezonit turistik në Librazhd ishin edhe përfaqësues të disa ambasadave duke përfshirë Ambasadën Amerikane, Austriake dhe Franceze. Ata në kuadër të aktiviteteve të “Librazhdi Turistik” morën pjesë edhe në një ndeshje futbolli që u luajt me skuadrën e formuar me operatorët turistikë të Librazhdit, një aktivitet që shërbeu edhe si një mundësi për të krijuar lidhje dhe bashkëpunim ndërkombëtar për zhvillimin e turizmit në këtë zonë.
Bashkia e Librazhdit është e angazhuar të vazhdojë punën për zhvillimin me ritme të shpejta të turizmit malor në të gjitha fshatrat e kësaj bashkie duke zhvilluar projekte të reja dhe duke përmirësuar çdo aspekt të infrastrukturës dhe shërbimeve për të tërhequr edhe më shumë vizitorë duke e pozicionuar kështu këtë rajon si një destinacion të preferuar turistik.
