ElbasaniPlus Lajmet më të fundit nga Elbasani dhe jo vetëm.
Një situatë shqetësuese paraqitet në aksin rrugor Librazhd–Peshkopi, ku deri më tani nuk është marrë asnjë masë për pastrimin apo kriposjen e rrugës, pavarësisht reshjeve të dëborës dhe ngricave të ditëve të fundit.
Si pasojë, qarkullimi në këtë segment mbetet tejet i vështirë dhe i rrezikshëm, duke lejuar kalimin vetëm të automjeteve të larta tip foristradë, dhe edhe këto vetëm me përdorimin e zinxhirëve.
Mungesa e ndërhyrjes nga institucionet përgjegjëse ka rritur pakënaqësinë e drejtuesve të mjeteve dhe banorëve të zonës, të cilët kërkojnë reagim të menjëhershëm për garantimin e sigurisë rrugore dhe vijueshmërisë së lëvizjes.
Ndërkohë, një segment i kësaj rruge, konkretisht ai që lidh qytetin e Librazhdit me Fushë Studen, qendrën e Njësisë Administrative Steblevë, është hapur falë ndërhyrjes së ASHP të Bashkisë Librazhd.
Ky veprim ka mundësuar lehtësimin e përkohshëm të lëvizjes për banorët e zonës, duke shmangur izolimin e tyre.
Autoritetet lokale dhe drejtuesit e mjeteve apelojnë për ndërhyrje urgjente nga institucionet përgjegjëse, në mënyrë që aksi Librazhd–Peshkopi të bëhet i kalueshëm dhe i sigurt për të gjithë përdoruesit e rrugës./vizionplus.tv
