ElbasaniPlus Lajmet më të fundit nga Elbasani dhe jo vetëm.
Një virozë e re stinore po qarkullon aktualisht në vend, duke shtuar ndjeshëm numrin e pacientëve që paraqiten në qendrat shëndetësore, veçanërisht fëmijë dhe të moshuar.
Sipas mjekëve të familjes, simptomat më të zakonshme janë diarreja, të vjellat, ethe, humbje ekuilibri, dhe herë pas here temperaturë deri në 37.5°C.
Viroza përhapet shpejt nga një anëtar i familjes tek tjetri, dhe është më e shpeshtë pas rikthimit nga pushimet verore.
“Kemi një fluks të shtuar pacientësh, kryesisht të moshave pediatrike dhe mbi 65 vjeç. Shfaqen me shenja të lehta gastrointestinale dhe në disa raste me temperaturë. Nëse simptomat zgjasin më shumë se 2-3 ditë, rekomandohet të paraqiten tek mjeku i familjes,” – u shpreh Barie Karasani, mjeke familje në Qendrën Shëndetësore Nr. 4, në Tiranë.
Edhe pse kjo virozë ka një kohëzgjatje të shkurtër, kujdesi në trajtim është thelbësor. Parandalimi dhe trajtimi i duhur janë të rëndësishëm. Qytetarët nuk duhet të zgjedhin vetëmjekimin, por të këshillohen me mjekun që në shenjat e para.
Mjekët paralajmërojnë gjithashtu se aktualisht po qarkullojnë edhe viroza të tjera, ndaj vetëmjekimi, sidomos me antibiotikë, nuk është zgjidhje dhe mund të përkeqësojë gjendjen.
