ElbasaniPlus Lajmet më të fundit nga Elbasani dhe jo vetëm.
Në bashkinë e Elbasanit ka pasur një fluks për aplikimin në Paketën e Maleve Mbi 250 qytetarë kanë shprehur interes për t’u përfshirë në Paketën e Maleve në territorin e Bashkisë së Elbasanit, një proces që synon nxitjen e investimeve dhe zhvillimin e qëndrueshëm të zonave malore presa i përket zhvillimit të turizmit.
Drejtor i Përgjithshëm i Politikave Pyjore dhe Bujqësore në Bashkinë e Elbasanit. Shpëtim Çullhaj shprehet se janë miratuar nga qeveria katër zona prioritare për zhvillim: Funari, Gjinari, Shushica dhe Tregani. Por objektivat janë që ky projekt të shtrihet edhe në zonat e tjera të bashkisë së Elbasanit, zonat që kanë regjistruar numrin më të lartë të aplikimeve janë dy zonat turistike ajo e Gjinarit dhe Funarit.
Aplikantët kanë shfaqur interes të investojnë kryesisht në agroturizëm, ndërsa më pak në energji të gjelbër dhe bletari.
Për Paketën e Maleve mund të aplikojë çdo qytetar që ka në përdorim tokë në zonat e përcaktuara si prioritare. Deri në përfundim të këtij procesi, Bashkia e Elbasanit synon të shpallë fituese të paktën 50 projekte, duke ndikuar në zhvillimin ekonomik lokal, rritjen e turizmit malor dhe forcimin e qëndrueshmërisë së këtyre zonave.
