Nga 1 gushti pasaportat dhe ID-të prodhohen nga shteti! A do të ndryshojë çmimi?

Duke nisur nga data 1 gusht 2023, kartat e identitetit (ID) dhe pasaportat biometrike të shqiptarëve do të prodhohen nga kompania e re shteterore “IdentiTek”, duke kaluar keshtu nga koncensionari “ALEAT” që  prodhonte nga viti 2009, kur për herë të parë u lancuan dokumentet biometrike, tek një shoqëri aksionere të krijuar së fundmi. Kontrata me kompaninë franceze “Idemia” që në Shqipëri njihet si “ALEAT” përfundon më 31 korrik, 15 vite pas nënshkrimit të saj në vitin 2008.

Pas 1 gushtit s’ka më kupona “Aleat”

Të gjithë qytetarët që duan të aplikojnë këto ditë pa vonesa për t’u pajisur me dokumente duhet të nguten deri në datën 26 korrik, pasi në data 27 deri më 31 korrik nuk do të jetë e mundur, për shkak të kalimit të detajeve të fundit të ndryshimit të dy kompanive.

Gjithçka do të jetë njëjtë, vendet e aplikimit, por edhe Posta Shqiptare për blerjen e kuponave të rinj me logon “IdentiTek”, me të cilëi nga data 1 gusht nis puna, jo vetëm brenda vendit por edhe në zyrat e aplikimeve jashtë Shqipërisë.

Çmimi nuk ndryshon

Bëhet e ditur se me ndërrimin e dy kompanive, të paktën për momentin nuk do të ketë ndryshime të çmimeve për t’u pajisur me një ID të re apo me një pasaporte biometrike. Për një pasaportë me një afat standard prodhimi 15 ditor duhet të paguajmë 7.500 lekë, ndërsa në një afat të përshpejtuar në vetëm 2 apo 3 ditë duhet të paguajnë 18.000 lekë, derisa për prodhimin e kartës së identitetit duhen 1.500 leke.