Mliza është një nga fshatrat e Elbasanit ku popullësia vjen në rritje. Banorët as janë larguar në qytet dhe as kanë emigruar. Si rrallë ndodh në fshat, numri i lartë i fëmijëve në shkollë, detyronte mësimin me dy turne. Për këtë shkak, me ndihmën e Emirit të Kuvajtit në fshatin Mlizë po ndërtohet një shkollë e re për arsimin fillor. Godina e re do të ketë 6 klasa shtesë, ndërtim i cili do të plotësojë të gjitha standardet.
![](https://i0.wp.com/www.elbasaniplus.com/wp-content/uploads/2021/02/WhatsApp-Image-2021-02-06-at-11.07.52.jpeg?resize=618%2C412&ssl=1)
Kryetari i Grupit Parlamentar të Partisë Socialiste Taulant Balla dhe deputeti Arben Kamami inspektuan ecurinë e punimeve. “Jo vetëm me buxhetin e shtetit, por edhe me ndihmën e qeverive mike dhe sipërmarrjeve private kemi arritur të bëjmë disa punë shumë të rëndësishme.
![](https://i0.wp.com/www.elbasaniplus.com/wp-content/uploads/2021/02/WhatsApp-Image-2021-02-06-at-11.07.53.jpeg?resize=618%2C403&ssl=1)
Kjo shkollë bëhet falë një bashkëpunimi shumë të mirë që kemi me Emirin e Kuvajtit, Sheikut Nawaf Al Ahmad Al Jaber Al Sabah, të cilin gjej rastin ta falenderoj. Kam kërkuar që cilësia të jetë më e mira dhe po ashtu të plotësohet edhe kabineti i informacionit.
![](https://i0.wp.com/www.elbasaniplus.com/wp-content/uploads/2021/02/WhatsApp-Image-2021-02-06-at-11.07.54.jpeg?resize=618%2C412&ssl=1)
Qëllimi është që në një shkollë në Mlizë apo në një shkollë në Tiranë, fëmijët të kenë të njëjtat standarde” tha Balla. Balla gjithashtu shtoi se rikonstruksioni i rrugës që bashkon dy lagjet e fshatit Mlizë do të jetë objektivi i ardhshëm i cili do të krijojë një unazë në këtë zonë të bukur të Elbasanit.