ElbasaniPlus Lajmet më të fundit nga Elbasani dhe jo vetëm.
Është ndër të paktët që ka mbetur në Gjinar të Elbasanit. Ardjan Bërdufi prej 15 vitesh merret me promovimin e fshatit të tij dhe mirëpret në çdo kohë turistë të huaj dhe vendas.
“Njerëzit këtu janë shumë punëtor, mikpritës, bujar dhe tradicional. Rinia ka lëvizur, i vetmi besnik në këtë zonë më duket se jam vetëm unë, për moshën time. Të tjerët janë të gjithë jashtë.
Shkollën e lartë e mbarova për Shkenca Politike, por pasioni im është turizmi dhe i mbetem besnik deri në detajet më të fundit. Një nga mundësitë më të mira për të bërë turizëm në Gjinar janë ecjet në natyrë dhe bujtinat. Turizmi fillon në pranverë deri në dhjetor. Të vish në Gjinar ke me çfarë të merresh, e kalon ditën dhe nuk e kupton. Këtu ka kënaqësi shpirtërore”, shprehet Ardjani për emisionin “Një nga ne” në Report Tv.
Angazhimi i tij fokusohet tek turistët, tek prodhimi i produkteve bio dhe tek fotografia.
“Jam përqëndruar tek prodhimet bio, disa i prodhoj dhe vet. Kemi mollë, kumbulla dhe qershi. Bashkë me gruan bëjmë 5 mijë-6 mijë copë komposto. Një komposto thane që do shumë punë të bëhet, shitet 250 lekë ose një qershie 200 lekë. Në përgjithësi restorantet dhe bujtinat çmimet i kanë shumë të mira. Unë kam qenë dhe në jug, si këtu nuk ka çmime”, thotë mes të tjerash.
Edhe kur nuk ka dasma apo ditëlindje, Ardjani e shfrytëzon kohën për të bërë ndonjë shkrepje. Pamja mbreslënëse që ofron ky fshat, nuk mund t’i shpëtojë syrit të fotografit.
“Në klasë të 6-të kam blerë aparatin e parë. Kam 31 vite me këtë profesion”, tregon ai teksa qëndron në zonën e mbuluar me pisha, një destinacion i preferuar nga nuset për setet e dasmës.
Kërkon të japë më të mirën në fushën e turizmit, ndaj shpesh del dhe jashtë vendit.
“Jemi 15 orë në punë, por ka dhe raste që pushojmë, që marrim eksperiencë. Kam shkuar në Zvicër, Austri, Gjermani. Kam rezervuar një bujtinë aty dhe kam parë si punon gjermani. Nuk është se bën ndonjë gjë më tepër nga ne”, thotë mes të tjerash Ardjani.
