Kur të mos ketë më vende në spitale ku do kurohemi? Skënder Brataj tregon si do të veprohet përpara se të shkojmë tek hotelet dhe stadiumet

Pak ditë më parë një deklaratë e kreut të Urgjencës Kombëtare, Skënder Brataj, alarmoi paksa të gjithë. “Nuk jemi në fazën e ezaurimit. Kur t’i mbushim të gjitha do t‘i trajtojmë në ambulanca, korridore, hotele apo stadiume, siç po bën e gjithë bota”, tha ai gjatë trajtimit të një pacienti me Covid në shtëpi, moment që u transmetua në ERTV më 29 nëntor.

Por ai ka shpjeguar me radhë se si do të procedohet në momentin që nuk do të ketë më vende për të kuruar pacientët në spitalet përkatëse:

“Do të aktivizohen spitalet rajonalë përpara se të ezaurohet COVID 4. Kemi plotësuar kapacitetet spitalore. Shumë herë keqinterpretohen thëniet tona. Ne nuk do shkojmë në hotele dhe stadiume. Pacientit do t’i shërbehet kudo në varësi të situatës. Kemi dhe një moment që do të bllokohet infeksioni me alternimin e mësimit si dhe me pjesën e pushimeve dimërore. Nëse do ezaurohen kapacitetet. Çfarëdolloj skenari të vijë, ne do i trajtojmë si të kemi mundësi. Askujt nuk do t’i mungojë trajtimi”, tha mjeku për ‘Report TV’.