ElbasaniPlus Lajmet më të fundit nga Elbasani dhe jo vetëm.
Regjistrimet për vitin e ri shkollor kanë nisur dhe në Elbasan po vërehet një interes i shtuar për arsimin profesional.
Të rinjtë po e shohin këtë rrugë si një mënyrë të sigurt për t’u integruar në tregun e punës. Në qendër të kërkesës janë degët si Teknologjia e Informacionit, Transporti dhe Turizmi, që lidhen ngushtë me tregun e punës dhe që u japin të rinjve mundësi reale për punësim pas shkollës.
“Nxënësit e bëjnë zgjedhjen e arsimit profesional, sepse e shohin që mund të marrin një profesion. Roli i prindit dhe orientimi i karrierës, që ka filluar nga klasat e gjashta deri në klasat e nënta, është një informacion kyç për sa i përket zgjedhjes dhe së ardhmes së fëmijës,” thotë Leonidha Haxhinikolla, drejtor i Shkollës Profesionale Elbasan.
Tashmë nuk është tabu: shumë vajza po zgjedhin arsimin profesional, por duke shmangiur profesionet si pompiste, xhenerike, ndonëse kjo shkollë dikur ka nxjerrë masivisht specialist të tillë dhe tregu i punës po i kërkon edhe sot si profesione.
“Fatkeqësisht sot vajzat nuk e zgjedhin edhe për arsyen se shihen si profesione mashkullore,” tregon z. Haxhinikolla.
Në Shkollën Profesionale Elbasan në disa degë po aplikohet sistemi dual, sipas të cilit nxënësit tri ditë punojnë e praktikohen në biznese, ndërsa dy ditë i kalojnë në shkollë.
/rtsh.al/
