ElbasaniPlus Lajmet më të fundit nga Elbasani dhe jo vetëm.
Një mënyrë ndryshe dhe kreative për të mësuar historinë është sjellë në shkollën artistike “Onufri” në Elbasan, ku nxënësit e klasave të 10-ta zhvilluan një projekt me temë “Bazilika e Elbasanit, një urë lidhëse mes qytetërimit antik dhe historisë së krishterimit”.
Përmes këtij projekti, nxënësit patën mundësinë të njihen më nga afër me vlerat historike dhe kulturore të qytetit të tyre, duke kuptuar rolin e rëndësishëm të Bazilikës së Elbasanit si një dëshmi e trashëgimisë ndër shekuj.
Puna në grup, kërkimi dhe prezantimet ndihmuan në zhvillimin e aftësive të tyre analitike dhe krijuese, duke sjellë një rezultat cilësor dhe me vlera edukative.
Ky aktivitet u realizua nën drejtimin e mësueses së historisë, Sonila Gega, në kuadër të procesit të saj të kualifikimit për titullin “Mësues Mjeshtër”.
E njohur për përkushtimin dhe qasjen kreative në mësimdhënie, Gega vijon të sjellë projekte frymëzuese që e bëjnë historinë më të gjallë për nxënësit.
Në një institucion si “Onufri”, ku arti dhe krijimtaria janë në qendër, projekte të tilla dëshmojnë se historia mund të mësohet përtej metodave tradicionale, duke u kthyer në një proces frymëzues dhe të prekshëm për të rinjtë.
Ky aktivitet konfirmon edhe një herë se ndërthurja e artit me historinë krijon ura të forta mes së shkuarës dhe së ardhmes, duke rritur ndërgjegjësimin për trashëgiminë kulturore të qytetit.
