ElbasaniPlus Lajmet më të fundit nga Elbasani dhe jo vetëm.
Elbasani ka nisur fazën përgatitore me ritëm maksimal dhe pa asnjë kompromis në ngarkesën e punës. Trajneri Ivan Gvozdenoviç ka vendosur që skuadra të stërvitet me nga dy seanca në ditë, për të fituar formën e duhur fizike dhe për të përthithur idetë taktike, që do të shoqërojnë ekipin gjatë sezonit të ri.
Kjo periudhë e parë shërben si bazë e fortë për ndërtimin e një skuadre që synon të jetë konkurruese dhe e qëndrueshme në të gjitha drejtimet. Siç dihet, përgatitjet po mbahen në kompleksin “Pepa”, ndërsa në datën 21 korrik do të udhëtojnë drejt fqinjëve të Greqisë.
GVOZDENOVIÇ “SHTRYDH” EKIPIN – Dinamika e dy seancave në ditë nuk është vetëm për të rritur nivelin fizik, por edhe për të matur limitet individuale dhe grupore. Gvozdenoviç po shtrydh gjithçka nga skuadra në këtë periudhë, me idenë se vetëm përmes punës së vështirë mund të ndërtohet një ekip me karakter të fortë dhe të gatshëm për sfidat që e presin. Çdo ditë përfshin një program të qartë dhe të ndarë në mënyrë të balancuar mes aspektit fizik dhe atij taktik.
Paraditet janë të rezervuara për punë fizike, përforcim muskulor, rezistencë, vrapime me intensitet të lartë dhe ushtrime për përgatitje atletike. Në seancat e pasdites, fokusi kalon te loja me topin, vendosja taktike, lëvizjet në bllok dhe ushtrimet situative që synojnë të krijojnë automatizma brenda skuadrës. Loja shpesh ndërpritet për korrektime, me synimin që çdo detaj të jetë i saktë që në fazë ndërtimi.
DISIPLINË & KONKURENCË – Një nga elementët që bie në sy në këtë fazë përgatitore është qasja e trajnerit në raport me vendet në formacion. Gvozdenoviç kërkon që çdo lojtar të fitojë vendin e tij përmes punës dhe angazhimit në stërvitje. Askush nuk është i përjashtuar nga konkurrenca dhe ritmi i lartë i ngarkesave po përdoret si filtër për të vlerësuar qëndrueshmërinë, gatishmërinë dhe seriozitetin e secilit futbollist. Për trajnerin, kjo fazë nuk është thjesht përgatitje, por test karakteri.
Përtej aspektit fizik dhe organizativ, filozofia e Gvozdenoviçit mbështetet në ndërtimin e një grupi të fortë në mentalitet. Trajneri kërkon një skuadër që nuk ndalet, që lufton për çdo top dhe që reagon me grintë dhe disiplinë në çdo moment të lojës. Ai i sheh këto ditë përgatitore si themelin e një skuadre me identitet të qartë dhe që mund të përballojë jo vetëm ngarkesat e sezonit, por edhe presionin e rezultateve. VLADIMIR MEMA-PANORAMASPORT.AL
