ElbasaniPlus Lajmet më të fundit nga Elbasani dhe jo vetëm.
Shkolla 9-vjeçare e Shushicës do të rikonstruktohet plotësisht brenda vitit 2025, duke hapur një kapitull të ri për 314 nxënës dhe 33 mësues që çdo ditë japin më të mirën për edukimin e brezit të ri.
Ky është një investim i shumëpritur dhe i kërkuar prej kohësh nga mësuesit, prindërit dhe i gjithë komuniteti, të cilët në çdo proces të buxhetimit me pjesëmarrje e kanë renditur si prioritet kryesor.
Kryetari i Bashkisë Elbasan, Gledian Llatja, theksoi se rikonstruksioni i shkollave në zonat rurale mbetet një ndër objektivat më të rëndësishëm të bashkisë:
“Ne kemi vendosur që çdo fëmijë, pavarësisht se ku jeton, të ketë të njëjtat kushte të mira për të mësuar. Shkolla e Shushicës do të rikonstruktohet nga themelet, me ambiente të reja, më të sigurta dhe më bashkëkohore, që i përgjigjen standardeve të arsimit modern.”
Kryetari shtoi se ky investim është pjesë e planit të gjerë për përmirësimin e infrastrukturës arsimore në të gjithë territorin e bashkisë.
“Në çdo cep të Elbasanit po investojmë për shkolla, rrugë dhe ambiente që i japin cilësi jetës së qytetarëve. Edukimi është baza e çdo zhvillimi, ndaj aty ku ka dije, ka edhe zhvillim,” – u shpreh Llatja.
Shkolla e re e Shushicës do të ketë kushte moderne për nxënësit dhe mësuesit, duke ofruar një hapësirë të denjë për mësim, bashkëpunim dhe frymë të re për komunitetin.
