ElbasaniPlus Lajmet më të fundit nga Elbasani dhe jo vetëm.
Në kuadër të përpjekjeve për një administratë më të hapur dhe transparente, Bashkia Elbasan organizon çdo të enjte takime të drejtpërdrejta me qytetarët në ambientet e institucionit. Këto seanca dëgjimore janë kthyer në një traditë të rëndësishme të komunikimit mes pushtetit vendor dhe komunitetit, duke u bërë një hap konkret drejt përfshirjes qytetare në procesin vendimmarrës.
Në këto takime merr pjesë rregullisht edhe kryetari i Bashkisë, Gledian Llatja, i cili ndjek nga afër shqetësimet e banorëve, jep sqarime për problematikat që ngrihen dhe ofron zgjidhje të menjëhershme aty ku është e mundur. Pjesëmarrja e tij e drejtpërdrejtë është një dëshmi e përkushtimit për të qenë sa më pranë qytetarëve dhe për t’i dëgjuar ata pa filtra.
Kjo nismë është jo vetëm një mjet komunikimi, por edhe një garanci e transparencës dhe përgjegjshmërisë institucionale. Bashkia Elbasan konfirmon angazhimin e saj për të ndërtuar një administratë efikase, që reflekton realisht nevojat e komunitetit dhe punon çdo ditë për të sjellë zgjidhje konkrete.
