ElbasaniPlus Lajmet më të fundit nga Elbasani dhe jo vetëm.
Dy aksidente rrugore janë regjistruar brenda pak minutash në rrugët kombëtare të Qarkut të Elbasanit, duke sjellë pasoja të rënda për jetën dhe shëndetin e qytetarëve.
Ngjarja më e rëndë ka ndodhur në segmentin Xibrakë–Labinot Fushë, në aksin Elbasan–Librazhd, ku dy automjete janë përplasur me shpejtësi të lartë. Si pasojë e përplasjes, dy persona mbetën të plagosur rëndë dhe u transportuan me urgjencë në spital, por njëri prej tyre nuk mundi t’u mbijetojë plagëve dhe ndërroi jetë.
Ndërkohë, në Kthesat e Murrashit është shënuar një tjetër aksident, ku një automjet ka dalë nga rruga. Për fat të mirë, drejtuesi i mjetit ka shpëtuar pa lëndime serioze, por incidenti ka rikthyer vëmendjen tek problematikat e sigurisë rrugore në këtë zonë.
Dyshohet se shpejtësia tej normave të lejuara dhe kushtet e vështira atmosferike, për shkak të reshjeve të dendura të shiut, kanë ndikuar në aksidentet e ndodhura. Hetimet janë në vijim për zbardhjen e plotë të rrethanave.
Autoritetet u bëjnë thirrje drejtuesve të mjeteve që të tregojnë kujdes maksimal në drejtimin e automjeteve, veçanërisht në segmentet me kthesa dhe shikueshmëri të kufizuar, duke respektuar rregullat e qarkullimit dhe duke ulur shpejtësinë në kushtet e motit të keq.
