Drejtoria e Policisë Elbasan shkon në Gjimnazin “Mahir Domi” për një arsye të veçantë

Ditën e sotme u zhvillua një takim sensibilizues, me nxënësit e shkollës së mesme “Mahir Domi”, me qëllim edukimin e të rinjve për një brez pa drogë, pa duhan dhe pa alkool.

Punonjësit e DVP Elbasan, në kuadër të programit “Edukimi, ndërgjegjësimi dhe reduktimi i kërkesës për drogë dhe substanca të tjera të rrezikshme”, kanë zhvilluar një orë edukative me nxënësit e klasave të 10-ta të kësaj shkolle, për ndërgjegjësimin e tyre për efektet negative që sjell në shëndet, përdorimi i duhanit, alkoolit dhe i substancave narkotike.

Të pranishëm në këtë takim ishin specialistë të Seksionit për Hetimin e Narkotikëve të DVP Elbasan, NSPK të Komisariatit të Policisë Elbasan, psikologia dhe punonjës socialë të shkollës.

Në kuadër të fushatës sensibilizuese “Edukimi, ndërgjegjësimi dhe reduktimi i kërkesës për drogë dhe substanca të tjera të rrezikshme”, do të vijojnë një sërë aktivitetesh dhe takimesh nëpër gjimnaze të ndryshme në qytetin e Elbasanit.