ElbasaniPlus Lajmet më të fundit nga Elbasani dhe jo vetëm.
Huatë për individët në Shqipëri shënuan një rritje të fortë në fund të tremujorit të katërt të vitit 2025, duke arritur në 371.2 miliardë lekë, ose 19.9% më shumë krahasuar me të njëjtën periudhë të vitit 2024. Të dhënat e Bankës së Shqipërisë tregojnë një zgjerim të qëndrueshëm të kreditimit, të nxitur kryesisht nga huatë konsumatore dhe kërkesa në rritje në zonat urbane.
Tirana mbetet motori kryesor i kreditimit, duke përqendruar mbi dy të tretat e totalit të huave për individët. Në kryeqytet, huatë arritën në 250.7 miliardë lekë, me një rritje vjetore prej 20.9%. Veçanërisht dinamike rezulton rritja e huave konsumatore, të cilat u zgjeruan me 23%, duke reflektuar rritjen e shpenzimeve të familjeve dhe akses më të lehtë në kredi.
Edhe huatë për blerje banesash në Tiranë shënuan rritje të konsiderueshme, në 18.5%, duke konfirmuar vazhdimësinë e kërkesës në tregun imobiliar, megjithëse me ritëm më të moderuar se kreditë për konsum.
Sipas qarqeve, Elbasani spikat me rritjen më të lartë për huatë totale, në 23.1%, ndërsa huatë konsumatore në këtë qark u rritën me një normë të fortë 30.5%, sinjal i një zgjerimi të shpejtë të kreditimit për shpenzime personale. Rritje mbi mesataren kombëtare u regjistruan edhe në Korçë me 20.4%, Durrës me 18.7% dhe Shkodër me 17.1%.
Ndryshe nga huatë konsumatore, kreditimi për blerje banesash, edhe pse me vlerë më të lartë, po rritet me ritme më të përmbajtura, veçanërisht jashtë Tiranës.
Korça dallohet si qarku ku huatë për blerje banesash dhe huatë konsumatore janë pothuajse në të njëjtin nivel, duke reflektuar një strukturë të balancuar të kreditimit për individët. Në fund të tremujorit të katërt 2025, huatë konsumatore në këtë qark arritën në 3.2 miliardë lekë, ndërsa huatë për banesa në 3.36 miliardë lekë, me një diferencë minimale mes dy zërave. Ky raport e veçon Korçën nga shumica e qarqeve të tjera, ku kreditimi dominohet qartë nga banesat.
