Autostrada Elbasan – Lekaj, shpallen fituesit për ndërtimin – Ofertat për 3 lote arrijnë 6 mld lekë, 1.5 mld lekë më pak se fondi limit

Teksa aksi rrugor nga Elbasani në Lekaj do të kthehet në autostradë, Autoriteti Rrugor Shqiptar ka shpallur kompanitë që do të kryejnë punimet në 3 lote të këtij segmenti.

Tenderët u hapën pak muaj më parë për 6 lote të rrugës, teksa 3 prej tyre duket se janë ende në proces.

Referuar ofertave fituese, në total tre lotet do të kushtojnë rreth 6 mld lekë, pa TVSH apo 1.5 mld lekë më pak se fondi limit i vënë në dispozicion.

Kjo rrugë është pjesë e korridorit 8 dhe sipas dokumenteve të tenderit projekti fillon në afërsi të ish- Kombinatit Metalurgjik në Elbasan, ku do të bëhet lidhja me bypassin e Elbasanit, që është në projektim e deri në Lekaj, ku bashkohet me autostradën ekzistuese të korridorit blu.

Gjatësia e rrugës është 40.7km dhe kalon në rajonet Elbasan (Bradashesh, Shirgjan, Gjegjan, Cërrik, Papër), Peqin (Pajovë, Shez, Gjocaj, Peqin, Karine) dhe Kavajë (Sinaballaj, Rrogozhinë).

Nisur nga kategoria e rrugës shpejtësia e lejuar pas përfundimit të punimeve do të jetë në intervalin 90 km/orë deri në 140 km/orë.

Korridori 8 konsiderohet si projekti bërthamë i infrastrukturës në vendin tonë, teksa në total për realizimin e kësaj vepre rrugore janë rreth 350 mln euro fonde publike për 14 segmente.

Ecuria për përfundimin e secilit prej tyre është e ndryshme, teksa më të avancuar janë segmentet nga Elbasani në Qafë Thanë.