ElbasaniPlus Lajmet më të fundit nga Elbasani dhe jo vetëm.
Për Hetlen Çapjan, Elbasani nuk duhet të ketë pishmane për sezonin që lanë pas, ndërsa ka pritshmëri të mëdha për atë që po troket. Në intervistën e dhënë për “Panorama Sport”, ish-kampioni elbasanas thekson se duhet ndërtuar një ekip me role të dubluara për të synuar trofe, ndërsa eksperiencën e fituar vitin që lamë pas, do të dinë ta vënë në shërbim këtë sezon.
Merkaton e pret që të bëhet në të gjitha repartet, me Gvozdenoviç që e njeh mirë skuadrën për të ditur se çfarë i duhet në afrime. Çapja beson se, me një eksperiencë mbi supe tanimë, do të jetë më e lehtë marrja e rezultatit dhe arritja e synimeve.
Çapja, si ishte sezoni që lamë pas për Elbasanin?
Në vija të përgjithshme, ishte pozitiv, edhe pse ne të gjithë donim të kapte “Final 4”, meqenëse gjërat shkuan deri në javën e fundit. Megjithatë, nuk ka pse të ketë pishmane për atë që nuk u bë, por t’i gëzohen asaj që arritën, duke qenë se ishin debutues.
Si e prisni sezonin e ri?
Pritshmëritë janë të mëdha, sepse të tilla ishin edhe sezonin që lamë pas. Me aq sa e njoh ambientin në Elbasan, besoj se sërish do të pretendojnë për të arritur sa më lart. Me ndryshimin e vetëm që këtë herë të mos dalin pa gjë, po të marrin një trofe ose së paku të shkojnë në Europë.
Çfarë duhet të bëjë për t’ia arritur?
E para është ndërtimi i një skuadre sa më kompetitive dhe rolet të jenë të dubluara. Është shumë e rëndësishme që stoli të jetë në lartësinë e titullarëve. Vetëm ashtu mund të pretendosh, sepse e kemi parë që skuadrat po ndahen shumë “hollë” në një ndeshje dhe një gabim i vogël të heq fitoren nga duart.
Ku i shihni më të rëndësishme ndërhyrjet?
Në të gjitha rolet. Besoj se edhe drejtuesit e kanë të qartë që përforcime duhen gjithandej. Vetëm të mos jenë me shumicë dhe të mos prishet grupi apo ajo harmoni që është krijuar deri më tani në skuadër.
Si e vlerësoni rikonfirmimin e Gvozdenoviç në stol?
Gjëja më e mirë e mundshme që mund të bëhej në këto momente. Unë shoh një “filing” mes tij dhe lojtarëve, por edhe klubit. Kjo është shumë e rëndësishme, sepse puna ecën më mbarë. Në fund të fundit, puna e një trajneri matet me rezultate dhe Gvozdenoviç i pati. Njëkohësisht, rikonfirmimi i tij i shpejtë i jep më shumë mundësi për të punuar për sezonin që i pret.
Çfarë ka më shumë Elbasani këtë vit se ai që lamë pas?
Eksperiencën. E dimë që në futboll disa ndeshje i fiton me eksperiencë, gjë që Elbasani nuk e pat vitin e kaluar. Këtë sezon do ta ketë dhe besoj se do ta vërë në shërbim për të shkuar te rezultatet.
VLADIMIR MEMA-PANORAMASPORT.AL
