Aksident i rëndë në Elbasan/Humb jetën 10 vjeçari që po kalonte në rrugë.

Një aksident është regjistruar këtë të Enjte rreth orës 14:00 në aksin rrugor Peqin -Elbasan. Aksidenti sipas burimeve nga vendngjarja ka ndodhur në fshatin Pajove dhe janë përshirë dy automjete.

Pas përplasjes njëri prej automjeteve ka dalë jashtë rruge duke përplasur për vdekje fëmijën e mitur rreth 10 vjeç.

Njoftimi i Policisë

Rreth orës 14:10, në aksin rrugor “Elbasan-Peqin”, në fshatin Pajovë, janë përplasur automjeti me drejtues shtetasin M. P., 39 vjeç, me automjetin me drejtues shtetasin M. S., 45 vjeç. Nga përplasja, shtetasi M. P. ka humbur kontrollin mbi drejtimin e automjetit, i cili ka dalë nga rruga dhe ka përplasur një të mitur 10-vjeçar që ka qenë duke lëvizur në anë të rrugës. Si pasojë e përplasjes, i mituri ka humbur jetën.

Të dy drejtuesit e automjeteve janë shoqëruar në ambientet e Policisë, për kryerjen e veprimeve të mëtejshme procedurale.

Grupi hetimor, në drejtimin e Prokurorisë, vijon punën për zbardhjen e rrethanave të aksidentit.