Rritet pasiguria; Një lloj i ri i COVID-19 tani po përhapet në të gjithë Europën

Një version i ri i koronavirusit që ka origjinën nga punëtorët spanjollë të bujqësisë, është përhapur me shpejtësi në të gjithë Evropën që nga vera dhe tani llogaritet të jetë i pranishëm në shumicën e rasteve të reja, prej tyre më së shumti në Britaninë e Madhe, raporton Financial Times sot, duke cituar një studim të ri shkencor.

Një ekip ndërkombëtar i shkencëtarëve që monitorojnë virusin përmes mutacioneve të tij gjenetike përshkruan në një letër kërkimore përhapjen e jashtëzakonshme të një varianti të ri të virusit të quajtur 20A.EU1. Puna e tyre sugjeron që njerëzit që ktheheshin nga pushimet në Spanjë luajtën një rol kryesor në transmetimin e virusit në të gjithë Evropën, duke pyetur nëse vala e dytë që prek Evropën mund të ketë qenë më e butë, nëse kontrollet në aeroporte dhe nyje të tjera të transportit do të ishin më të mira dhe më të rrepta.

Për shkak se secili variant i virusit ka nënshkrimin e vet gjenetik, ai mund të gjurmohet atje ku e ka origjinën. “Nga përhapja e 20A.EU1, duket qartë se masat parandaluese shpesh nuk kanë qenë të mjaftueshme për të ndaluar transmetimin e mëtejshëm të llojeve të reja të virusit këtë verë”, tha Emma Hodcroft, një gjenetiste evolucionare në Universitetin e Bazelit dhe autore kryesore e studimit që ende nuk është botuar.

Ekipet shkencore në Zvicër dhe Spanjë tani po nxitojnë të shqyrtojnë sjelljen e një lloji të ri të virusit për të përcaktuar nëse mund të jetë më vdekjeprurëse ose ngjitëse sesa llojet e tjera.

Hodcroft theksoi se 20A.EU1 është i ndryshëm nga çdo version i virusit Sars-Cov-2, i njohur më herët.