Kryeministri Edi Rama i ka besuar Ministrinë e Arsimit deputetes së Partisë Socialiste, Evis Kushi. Ditën e sotme, Rama ka larguar nga detyra ministren Besa Shahini, duke i dorëzuar çelësat e ministrisë deputetes së Elbasanit znj. Evis Kushi. Por, kush është Evis Kushi, deputetja që do të shërbejë në postin e ministres?
Evis Kushi lindi në Elbasan, më 7 tetor 1975. Ka kryer studimet e larta në Universitetin e Tiranës, Fakulteti Ekonomik, dega Administrim Biznesi. Gjithashtu në vitet 2003-2008 ka studiuar në Staffordshire University, Angli, PhD në Ekonomi Turizmi. Në vitin 2010 ka marrë titullin “Profesor i Asociuar” në Universitetin “Aleksandër Moisiu” në Durrës. Në vitin 2016 ka marrë titullin “Profesor” në Universitetin Bujqësor të Tiranës.
![](https://i0.wp.com/www.elbasaniplus.com/wp-content/uploads/2020/09/evis-kushi1.jpg?resize=618%2C612&ssl=1)
Ka një përvojë të gjatë pune në universitet. Nga viti 1998 deri në vitin 2013 ka qenë lektore në Universitetin “Aleksandër Xhuvani” në Elbasan. Në vitin akademik 2008-2009 ka qenë lektore në Universitetin Shtetëror të Tetovës, Fakulteti Ekonomik, Maqedoni. Në vitet 2012-2013 ka qenë dekane e Fakultetit Ekonomik në Universitetin “Aleksandër Xhuvani” në Elbasan.
![](https://i0.wp.com/www.elbasaniplus.com/wp-content/uploads/2020/09/evis-kushi2.jpg?resize=618%2C412&ssl=1)
Zonja Kushi është zgjedhur deputete e Partisë Socialiste në vitin 2013 dhe është anëtare në Komisionin për Ekonominë dhe Financat. Ajo është autore dhe bashkautore e botimeve të ndryshme shkencore në fushën e marketingut dhe turizmit.