ElbasaniPlus Lajmet më të fundit nga Elbasani dhe jo vetëm.
Në kuadër të festimeve të Ditës së Verës, Qendra e Formimit Profesional Publik Elbasan organizoi një aktivitet të veçantë kushtuar një prej simboleve më të njohura të qytetit: ballokumes tradicionale. Aktiviteti u zhvillua përmes një konkursi mes kursantëve të qendrës, të cilët garuan për përgatitjen e ballokumes më të mirë, duke sjellë jo vetëm shijen e traditës, por edhe kreativitetin e tyre në këtë trashëgimi kulinare.
Në aktivitet morën pjesë Kryetari i Bashkisë Elbasan, Gledian Llatja, dhe Kryetarja e Këshillit të Qarkut Elbasan, Ermira Urupi, të cilët përgëzuan nismën e qendrës dhe vlerësuan rolin e saj në ruajtjen e traditave të qytetit.
Kryetari i Bashkisë Elbasan, Gledian Llatja, theksoi se aktivitete të tilla janë shumë të rëndësishme për promovimin e ballokumes dhe traditës elbasanase, duke nënvizuar edhe rëndësinë e transmetimit të kësaj trashëgimie nga një brez te tjetri.
Ndërkohë, Kryetarja e Këshillit të Qarkut Elbasan, Ermira Urupi, u shpreh se ruajtja dhe promovimi i traditave lokale është një element i rëndësishëm i identitetit kulturor të zonës, duke vlerësuar përfshirjen e të rinjve në aktivitete që i lidhin ata me historinë dhe kulturën e qytetit.
Drejtori i Qendrës së Formimit Profesional Publik Elbasan, Krenar Xhemali, falënderoi stafin e qendrës për përkushtimin dhe punën e tyre në organizimin e aktivitetit, si dhe kursantët që u angazhuan me pasion në këtë konkurs. Ai theksoi se qendra vijon të jetë një institucion i rëndësishëm për zhvillimin e aftësive profesionale të të rinjve, duke ndërthurur formimin profesional me ruajtjen dhe promovimin e traditave të qytetit të Elbasanit.
Aktiviteti u prit me shumë interes dhe krijoi një atmosferë festive, duke dëshmuar edhe një herë se tradita e ballokumes mbetet një nga simbolet më të dashura të Elbasanit, që vazhdon të jetojë dhe të përcillet me krenari nga brezi në brez.
