Të shtënat me armë zjarri pas sherrit për pronat, identifikohet autori. Zbardhen detajet e para

Një sherr për pronat ka degraduar në përdorimin e armës së zjarrit një ditë më parë, fatmirësisht pa shkaktuar pasoja në njerëz.

Policia bën me dije se ka ndaluar autorin, shtetasin D. H., 37 vjeç, banues në fshatin Çepe, Belsh.

Sipas bluve, ky shtetas, ditën e djeshme, “gjatë një konflikti për motive pronësie me shtetasin K. C., dyshohet se ka qëlluar një herë me armë zjarri pistoletë në ajër dhe më pas është larguar”.

Njoftimi nga Policia Elbasan

Specialistët për Hetimin e Krimeve në Komisariatin e Policisë Cërrik kapën dhe ndaluan shtetasin D. H., 37 vjeç, banues në fshatin Çepe, Belsh, për veprat penale “Mbajtja pa leje e armëve dhe municionit luftarak”, “Kanosja” dhe “Prishja e qetësisë publike.

Ky shtetas, ditën e djeshme, në fshatin Çepe, Belsh, gjatë një konflikti për motive pronësie me shtetasin K. C., dyshohet se ka qëlluar një herë me armë zjarri pistoletë në ajër dhe më pas është larguar.

Po ashtu:

Shërbimet e Seksionit Operacional në DVP Elbasan kapën dhe ndaluan shtetasin E. Xh., 51 vjeç, banues në Elbasan, pasi Gjykata e Shkallës së Parë Elbasan i ka caktuar masën e sigurisë “Arrest në burg”, për veprën penale “Prodhimi dhe shitja e lëndëve narkotike”.

Matrialet hetimore i kaluan Prokurorisë pranë Gjykatës së Rrethit Gjyqësor Elbasan, për veprime të mëtejshme.