Rritja e ‘çmendur’ e çmimeve/ Të moshuarit në Elbasan: E hedhim vajin me lugë tani, nuk del pensioni as për ilaçe…

Ndërsa çmimet kanë ditë që kanë “fluturuar” qytetarët në mënyrë të vazhdueshme ankohen se nuk mund të përballojnë dot shpenzimet mujore. Më te prekurit e situatës që i faturohet luftës janë të moshuarit, familjet që trajtohen me ndihmë ekonomike dhe kategori të ndryshme vulnerabël.

Edhe pse qeveria vendosi ti mbështesë këto kategori nëpërmjet paketës së rezistencës sociale me 3 mijë leke të reja për tre muaj pensionistët në Elbasan pohojnë se kjo masë është e pamjaftueshme. Sipas tyre me pensionet qe marrin dhe nëse do ti shtojnë mbështetjen e qeverisë është e pamundur të mbulojnë kostot e jetesës, ndërsa pjesa madhore e pensionit u shkon për medikamente.

Në kushtet kur supermarketet por dhe dyqanet e lagjeve kanë ngritur cmimin e cdo produkti të moshuarit thonë se janë të detyruar të blejnë më pak. Sipas tyre vajin kanë nisur ta hedhin me lugë , sikundër bënin shumë vite me parë.

Në paketën e rezistences sociale Kryeministri sqaroi se nuk përfitojnë të gjithë pensionistët por ajo kategori që merr pension sa gjysma e pagës mimale. Edhe ky kriter ka shkaktuar indinjatën e moshës së tretë në Elbasan./faxnews