Automotoparku, Tjetër destinacion tërheqës në Elbasan. Vijojnë përgatitjet. Te rejat

Projekti i ndërtimit të automotoparkut në Elbasan është një hap historik për aktivitetet automobilistike, si dhe për promovimin e kulturës së motosportit në Shqipëri. Kryetari i grupit parlamentar të Partisë Socialiste, Taulant Balla, njëkohësisht deputet i Elbasanit u ndal sot te ky projekt i rëndësishëm.

Balla ndau projektin e planit të vendosjes së pistës së automotoparkut ultramodern të Elbasanit, ndërsa shtoi se ëndrra për të krijuar një destinacion tjetër në Elbasan, po ecën çdo ditë drejt realizimit.

Cirkuiti i parë shqiptar do të ketë një pistë rreth 5 km dhe një sipërfaqe prej mbi 500 mijë m2 në qytetin e Elbasanit, sipas standardeve të FIA, FIM dhe CIK. Do të përmbajë qendër eventesh, muze e atelier RETRO, drag strip me gjatësi 1.2 km në kushte sigurie, autodrom dhe kartodrom, akademi motosporti dhe akademi edukimi mbi sigurinë rrugore, poligone profesionale testimi, pistë jashtë rruge, helipad dhe zonë sportive mjetesh ajrore ultra të lehta.

Projekti do të financohet nga fondet e DPSHTRR-MIE në bashkëpunim me bashkinë e Elbasanit dhe me mbështetjen e qeverisë shqiptare.

Ndërkohë Bashkia Elbasan ka dërguar në AKPT propozimin për planin e ri zonal që përfshin pritën lumore dhe gjurmën e nevojshme për hartimin e VKM për kalimin e terrenit në administrim të DPSHTRR për të formalizuar Automoparkun dhe kompleksin e ri rajonal të DRSHTRR Elbasan!

Gjithashtu është miratuar projekti për rrugëkalimin e ri nën hekurudhë, me lartësi 4.8 metra, në daljen që do të lidhë unazën e Elbasanit me Automotoparkun!