Situata në aksin Librazhd-Elbasan, vijon puna për ndërtimin e rrugës alternative në krah të hekurudhës

Prej gati një javë juglindja e vendit vijon të mbetet e paralizuar si pasojë e shembjes së aksit kyç Librazhd- Elbasan që e lidh atë me pjesën tjetër të vendit. Autoriteti Rrugor Shqiptar ka nisur punën në disa fronte, me synim zgjidhjen sa më të shpejtë të situatës së krijuar.

Aktualisht po punohet për heqjen e masave të dherave në të dy anët e rrugës ekzistuese, me qëllim hapjen e terrenit ku do të vendosen sondat për realizimin e studimit të detajuar gjeologjik dhe për vlerësimin teknik të zonës pas rrëshqitjes.

Paralelisht, me shtimin e mjeteve të rënda, kanë nisur punimet për sistemimin e rrjedhës së lumit Shkumbin.

Rrjedha po orientohet në krahun e majtë, për të krijuar hapësirën e nevojshme për ndërtimin e një rruge alternative përgjatë linjës hekurudhore.

Pas përfundimit të studimit gjeologjik, do të kryhet ripunimi i projektit të zbatimit për aksin e ri rrugor Elbasan–Librazhd–Qafë Thanë.