ElbasaniPlus Lajmet më të fundit nga Elbasani dhe jo vetëm.
Një moment simbolik dhe i mbushur me emocion është ndarë në rrjetet sociale nga deputeti më i ri socialist i Qarkut Elbasan, Adi Qose, i cili publikoi takimin me 12-vjeçaren Ambra Alimeta, vajzën që surprizoi opinionin publik me fjalimin e saj në Kuvendi i Shqipërisë.
Në postimin e tij, Qose e cilëson Ambrën si “yllin më të famshëm të momentit”, duke theksuar se fjala e saj në Kuvend përfaqësonte një zë të pastër të një gjenerate që di të ëndërrojë, të artikulojë qartë dhe të besojë fort në të ardhmen europiane të vendit.
“Sot pata kënaqësinë të takoja yllin më të famshëm të momentit AMBRA ALIMETA
e cila me fjalimin e saj në Kuvendin e Shqipërisë na surprizoi të gjithëve dhe na mbushi me krenari.
Zëri i saj është zëri i një gjenerate që di të ëndërrojë, të artikulojë qartë dhe të besojë fort te e ardhmja europiane e vendit tonë.
Shembulli më i bukur se #Elbasani2030 dhe Shqipëria pjesë e Bashkimit Evropian janë një vizion që po rritet bashkë me të rinjtë tanë.
“-shkruan Qose
Vetë Ambra ka treguar se përgatitja për atë moment ka qenë intensive dhe e mbushur me emocion. Ajo pranoi se, megjithëse ndiente tension përpara se të ngjitej në foltore, u përpoq t’i kontrollonte emocionet për të folur me qartësi dhe siguri.
“Kur nisa të flisja, kuptova se situata nuk ishte aq e lehtë sa e kisha menduar,” – është shprehur ajo, duke treguar se përvoja në sallën e Kuvendit rezultoi më sfiduese nga sa dukej.
Megjithatë, mesazhi i saj preku publikun. Fjalimi u shpërnda gjerësisht në rrjetet sociale, mori reagime të shumta pozitive dhe u kthye në një simbol shprese për të rinjtë.
Deputeti Qose e lidhi këtë moment me vizionin për #Elbasani2030, duke theksuar se integrimi i Shqipërisë në Bashkimin Europian është një projekt që rritet paralelisht me brezin e ri. Sipas tij, Ambra përfaqëson energjinë, guximin dhe besimin që i nevojiten vendit në këtë rrugëtim.
Takimi mes deputetit dhe 12-vjeçares nuk ishte thjesht një foto simbolike, por një mesazh i qartë: e ardhmja ndërtohet mbi zërat e rinj që guxojnë të flasin, të ëndërrojnë dhe të kërkojnë më shumë për vendin e tyre.
Në fund të takimit, deputeti Adi Qose ka ndarë një tjetër moment të veçantë me 12-vjeçaren e talentuar Ambra Alimeta, e cila këtë herë e ka surprizuar me botimin e saj të parë, librin “Sekretet nën rrënojat e qytetit”.
Me një imagjinatë të pasur dhe dashuri të dukshme për qytetin e saj, Ambra vjen si një zë i ri premtues në krijimtarinë letrare. Ky botim i parë shihet si nisja e një rrugëtimi që pritet të sjellë histori të tjera, të frymëzuara nga Elbasani, shoqëria dhe ëndrrat e brezit të saj.
Një moment krenarie për Elbasanin dhe një histori që dëshmon se brezi i ri po merr fjalën – me kurajo, qytetari dhe vizion europian.
