ElbasaniPlus Lajmet më të fundit nga Elbasani dhe jo vetëm.
Ngjarja e rëndë kriminale që tronditi mbrëmjen e kësaj të premte qytetin e Elbasanit, ku biznesmeni i njohur Mondi Mëhalla mbeti viktimë e një atentati me armë zjarri, ka marrë një tjetër zhvillim pas daljes së komunikatës zyrtare paraprake nga organet ligjzbatuese.
Sipas informacionit të publikuar nga Policia e Shtetit, rreth orës 20:35 është marrë njoftimi se në lagjja Emin Matraxhiu, brenda një automjeti të parkuar, është gjetur i vrarë me armë zjarri shtetasi M. M., alias E. H., 43 vjeç – identifikuar si Mondi Mëhalla.
Uniformat blu kanë reaguar menjëherë, duke mbërritur në vendin e ngjarjes dhe duke ngritur pika të shumta kontrolli në daljet kryesore të qytetit. Paralelisht, policia po ushtron kontrolle të zgjeruara në terren dhe ambiente të ndryshme, në funksion të identifikimit dhe kapjes së autorit apo autorëve të dyshuar.
Për zbardhjen e plotë të atentatit është ngritur një grup i posaçëm hetimor, i cili po punon nën drejtimin e Prokuroria e Rrethit Gjyqësor Elbasan. Burimet policore bëjnë me dije se hetimet po përqendrohen në sqarimin e dinamikës, mbledhjen e provave, dokumentimin ligjor të ngjarjes si dhe në identifikimin e personave të përfshirë.
Autoritetet konfirmojnë se puna hetimore vijon intensivisht dhe se detaje të reja mbi ngjarjen do të bëhen publike në vazhdim, pas përfundimit të veprimeve procedurale dhe verifikimit të provave nga strukturat kompetente.
