ElbasaniPlus Lajmet më të fundit nga Elbasani dhe jo vetëm.
Elbasani po tregon me vendimet e merkatos së kësaj vere se po ndjek një linjë të qartë rinovimi dhe ndërtimi për të ardhmen, duke i dhënë prioritet freskisë dhe moshës së re në përbërjen e skuadrës.
Emra me eksperiencë që dhanë kontribut në sezonin e kaluar janë përshëndetur me klubin, ndërsa drejtuesit nuk e kanë fshehur orientimin në ndërtimin e një grupi më të ri dhe më energjik, në përputhje me filozofinë e trajnerit dhe drejtimit të ri sportiv. Kjo lëvizje nuk është e rastësishme, por pjesë e një politike të qartë që synon të rrisë ritmin dhe intensitetin e skuadrës në fushë. Edhe pse përvoja ka vlerën e vet, Elbasani po investon më shumë te dinamika dhe e ardhmja, duke u hapur rrugë lojtarëve më të rinj që kanë potencial për të qëndruar afatgjatë në projektin verdheblu. Mbetet për t’u parë nëse kjo “alergji” nga 30-vjeçarët do të japë efekt pozitiv në ecurinë e ekipit në Kategorinë Superiore, por sinjalet e para tregojnë një Elbasan më modern dhe më të orientuar drejt së ardhmes.
LARGIMET – Nga gjashtë lojtarët që nuk janë më pjesë e skuadrës, katër prej tyre janë mbi 30 vjeç: Orgest Gava (35), Edon Hasani (33), Ardit Hila (32) dhe Harallamb Qaqi (31). Bëhet fjalë për futbollistë me përvojë, disa prej të cilëve kanë qenë edhe titullarë të rëndësishëm në sezonin e ngjitjes në Superiore, por që, me sa duket, nuk bëjnë më pjesë në planet afatgjata të verdhebluve. Largimi i tyre, së bashku me atë të Esin Hakajt (28 vjeç) dhe Amarildo Gjonit (25 vjeç), konfirmon qartësisht prirjen e klubit për të ndërtuar një skuadër më të re në moshë, më dinamike dhe me perspektivë afatgjatë. Elbasani po e bën të qartë se projekti i rikthimit në elitë nuk do të bazohet mbi eksperiencën e lojtarëve të vjetër, por mbi energjinë e brezit të ri dhe profilin e futbollistëve që mund të përshtaten me kërkesat e futbollit modern
I MBIJETUARI – Në mesin e ndryshimeve të shumta në skuadrën e Elbasanit, një emër ka arritur të “mbijetojë” mes largimeve të shumta të veteranëve, është Emiljano Musta. Mbrojtësi 33-vjeçar është i vetmi lojtar mbi 30 vjeç që ka mbetur pjesë e skuadrës verdheblu pas spastrimit të kësaj vere, duke treguar se ende konsiderohet një element me vlera në projektin e ri të klubit. Musta ka fituar besimin e stafit teknik dhe drejtuesve, falë profesionalizmit, qëndrueshmërisë dhe rolit të tij si lider në fushë dhe jashtë saj. Në një Elbasan që po orienton gjithçka drejt së ardhmes dhe moshës së re, ai mbetet përjashtimi që konfirmon rregullin. Me përvojën e tij dhe njohjen e ambientit, Musta shihet si një pikë referimi për grupin dhe një urë lidhëse mes brezit të ri dhe objektivave madhorë të sezonit. Prania e tij në skuadër mund të shërbejë si stabilizues në një ekip në transformim të plotë. Me largimin e shumë emrave me përvojë, përgjegjësitë ndaj Mustës pritet të rriten edhe më shumë, si në aspektin teknik, ashtu edhe në drejtimin e grupit brenda dhomave të zhveshjes.
AFRIMET – Tri përforcimet e deritanishme, Martin Janaçek dhe Roei Ben Shimon, të dy 24 vjeç, si dhe Donart Ibraimi, 21 vjeç, dëshmojnë qartë se klubi po investon në energjinë, ambicien dhe potencialin e brezit të ri. Ky orientim drejt lojtarëve të rinj lidhet ngushtë me synimin për të krijuar një bërthamë që jo vetëm të ndihmojë menjëherë ekipin në fushë, por edhe të rritet bashkë me projektin e Elbasanit në vitet në vijim. Të afruarit pritet të sjellin freski, dinamizëm dhe uri për sukses, elemente që mund të jenë vendimtare në një kampionat të gjatë dhe të vështirë. Duke u fokusuar te lojtarë me moshë mesatare të ulët, Elbasani po përpiqet të ndërtojë një identitet të ri teknik dhe strategjik, duke ruajtur një ekuilibër mes përvojës që ekziston tashmë në skuadër dhe potencialit të rinisë që po i bashkohet.
VLADIMIR MEMA-PANORAMASPORT.AL
