ElbasaniPlus Lajmet më të fundit nga Elbasani dhe jo vetëm.
Elbasani doli vetëm me një pikë nga dueli me Egnatian, një rezultat që megjithatë i mjafton për të qëndruar në krye të renditjes, në të njëjtin nivel me Vllazninë.gvozdenovic
Ishte një ndeshje e luftuar dhe me ritëm të lartë, ku verdheblutë treguan karakter, sidomos duke marrë parasysh rrethanat e vështira në të cilat u gjendën që në fillim të takimit. Pas përfundimit të sfidës, trajneri Ivan Gvozdenoviç foli për “Panorama Sport”, duke analizuar me qetësi gjithçka ndodhi në fushë dhe duke vënë theksin tek momentet kyçe që ndikuan në rezultatin përfundimtar.
“Nuk jemi shumë të kënaqur me barazimin, sepse para ndeshjes ishim përgatitur për të fituar dhe kishim besim të plotë te tre pikët. Megjithatë, mënyra si shkoi ndeshja, sidomos me kartonin e kuq që në minutat e para dhe me katër-pesë raste shumë të pastra për gol, e bën këtë barazim disi më të pranueshëm. Për mua, momenti më i rëndësishëm ishte rasti i Lajthisë në pjesën e parë, kur topi u ndal në shtyllë, në një kohë kur ne po luanim me 10 lojtarë. Kur përballesh me një kundërshtar të fortë si Egnatia, një gol shpesh vendos gjithçka dhe ne ishim shumë pranë kësaj. Gjithsesi, nuk kam asgjë për të kritikuar ndaj djemve, pasi ata dhanë maksimumin në çdo moment dhe treguan shpirt gare. Ne do të vazhdojmë rrugën tonë me të njëjtin përkushtim”, u shpreh fillimisht trajneri i Elbasanit, duke treguar njëkohësisht krenari dhe keqardhje për rastet e humbura.
ZËVENDËSIMET – Në këtë ndeshje, Gvozdenoviç vendosi të bëjë vetëm dy zëvendësime nga pesë që kishte në dispozicion, një zgjedhje që tërhoqi vëmendje, por që sipas tij ishte e menduar mirë në bazë të asaj që po ndodhte në fushë. “Nuk kishte shumë nevojë për ndryshime të shumta, sepse lojtarët që ishin në fushë po performonin mirë dhe po mbanin ritmin e duhur të lojës. Ndërrova Ze Gomesh me Tsaguen në fillim të pjesës së dytë për të sjellë më shumë energji, ndërsa më pas futa Nongoh në vend të Loukilit për të shtuar shpejtësinë dhe freskinë në fazën sulmuese. Në mesfushë ishim të organizuar mirë dhe kishim ekuilibër, ndërsa në prapavijë dhe në portë Totoshi ishte në një formë shumë të mirë, duke na dhënë siguri. Për këtë arsye, nuk pashë arsye për të bërë ndërhyrje të tjera, pasi skuadra po funksiononte si duhet”, sqaroi ai, duke theksuar besimin tek grupi që kishte në fushë.
PUSHIMI – Trajneri u ndal edhe tek periudha e pushimit për shkak të ndeshjeve të Kombëtares, një moment që mund të rezultojë pozitiv për skuadrën e tij në këtë fazë të sezonit. Ai theksoi se ky pushim vjen në një kohë të përshtatshme, sidomos duke marrë parasysh disa probleme fizike në skuadër. “Ndoshta ky pushim do të na ndihmojë shumë, pasi kemi disa lojtarë që kanë nevojë për rikuperim. Do të kemi një javë të plotë për t’u qetësuar dhe për të rikthyer energjitë, ndërsa në javën pasuese do të fillojmë përgatitjet specifike për ndeshjen me Dinamon. Shpresojmë që lojtarë si Diallo dhe Qose të rikuperohen plotësisht dhe të jenë të gatshëm për t’iu bashkuar grupit, pasi prania e tyre do të na japë më shumë alternativa dhe cilësi në lojë”, theksoi tekniku, duke parë përpara me optimizëm dhe me shpresë që ndaj bluve të jenë më të plotë.
TIFOZËT – Në fund, Gvozdenoviç nuk harroi të vlerësojë mbështetjen e tifozëve, të cilët ishin të pranishëm në numër dhe krijuan një atmosferë të ngrohtë gjatë gjithë ndeshjes. Ai e konsideroi këtë mbështetje si një faktor shumë të rëndësishëm për skuadrën. “Respekt maksimal për tifozët tanë, sepse krijuan një ambient fantastik dhe na mbështetën gjatë gjithë kohës. Elbasani është një qytet që e do shumë futbollin dhe kjo ndihet kudo që ne luajmë, jo vetëm në shtëpi. Kjo përkrahje na jep motivim shtesë dhe na shtyn të japim më të mirën në çdo ndeshje. Dua t’i falënderoj sinqerisht për mbështetjen e tyre të vazhdueshme”, përfundoi ai, duke nënvizuar lidhjen e fortë mes skuadrës dhe tifozërisë. Në duelin e fundit me Egnatian në tribuna kishte më shumë sesa 5 mijë të pranishëm, gjë që nuk ndodh shpesh në futbollin shqiptar.
VLADIMIR MEMA-PANORAMASPORT.AL
