ElbasaniPlus Lajmet më të fundit nga Elbasani dhe jo vetëm.
Ish-futbollisti i Elbasanit, Dhimitër Gjika, e cilëson fitoren ndaj Dinamos si një sukses me peshë të madhe për momentin që po kalon skuadra. Sipas tij, ky rezultat erdhi në kohën e duhur dhe i shërben ekipit jo vetëm në aspektin e renditjes, por edhe në atë psikologjik. “Ka qenë një fitore shumë e rëndësishme, sidomos për momentin në të cilin erdhi. Ekipi kishte nevojë për një rezultat pozitiv për të rikuperuar besimin dhe moralin”, shprehet Gjika.
Ai vlerëson mënyrën se si lojtarët e menaxhuan ndeshjen, duke theksuar qetësinë dhe përgatitjen taktike të skuadrës. “Pavarësisht presionit, lojtarët e menaxhuan mirë topin dhe shfrytëzuan hapësirat e kundërshtarit. Kjo tregon qartë për punën dhe përgatitjen taktike që ka bërë stafi teknik”, thekson ish-futbollisti.
Duke folur për ecurinë e Elbasanit në kampionat, Gjika nënvizon se pozicioni aktual i skuadrës është tregues i një pune serioze dhe të qëndrueshme. “Jemi vetëm një pikë larg kreut dhe kjo tregon se po luhet një futboll i organizuar dhe me përkushtim. Elbasani sot është një konkurrent real për titullin”, thotë ai, duke shtuar se ekipi duhet të ruajë qetësinë dhe përqendrimin.
Një meritë të veçantë në këtë fazë të sezonit, Gjika ia atribuon trajnerit Ivan Gvozdenoviç. “Trajneri ka sjellë disiplinë, taktika të qarta dhe një frymë pozitive te lojtarët. Qasja e tij ndaj ekipit është një nga arsyet kryesore pse Elbasani po performon në këtë nivel”, deklaron ai.
Në prag të ndeshjes së ardhshme ndaj Partizanit, ish-futbollisti apelon për kujdes maksimal. “Partizani është një kundërshtar shumë i fortë dhe çdo gabim mund të kushtojë shtrenjtë. Megjithatë, me këtë ecuri dhe me performancën aktuale, Elbasani ka shanse reale për të fituar”, shprehet Gjika.
Në fund, ai ndalet te forca kolektive e skuadrës, duke vlerësuar funksionimin e grupit mbi individualitetet. “Ajo që më pëlqen më shumë është që skuadra po funksionon si një unitet. Përparimi nuk vjen nga një lojtar i vetëm, por nga bashkëpunimi dhe përgjegjësia e të gjithëve”, thotë Gjika, duke dhënë edhe një mesazh të qartë për vazhdimësinë e sezonit: “Fitoret janë të rëndësishme, por nuk duhet të bien në eufori. Disiplina dhe puna e përditshme janë çelësi për të qëndruar në krye”.
