ElbasaniPlus Lajmet më të fundit nga Elbasani dhe jo vetëm.
Vora dhe Elbasani rikthehen përballë njëri-tjetrit në një duel që tashmë ka krijuar një histori të veçantë mes dy skuadrave. Përpara sfidës së radhës, statistikat flasin për një rivalitet të ekuilibruar, ku rezultatet e ngushta kanë qenë karakteristikë e këtyre përplasjeve.
Kjo do të jetë përballja e pestë mes tyre në kampionate, pa llogaritur finalen e Kategorisë së Dytë, e cila gjithashtu ishte pjesë e historikut mes dy klubeve. Në Kategorinë e Parë, të tre ndeshjet e zhvilluara më herët kanë prodhuar të njëjtin rezultat: barazim pa gola. Përballjet në Kategorinë e Parë: 2 maj 2025: Vora – Elbasani 0-0
21 shkurt 2025: Elbasani – Vora 0-0
13 dhjetor 2024: Vora – Elbasani 0-0
Tri ndeshje, tri barazime identike, duke treguar kujdes maksimal, luftë të fortë mes dy skuadrave dhe një rivalitet të mbyllur në çdo detaj. Ndërkohë, ndeshja e vetme mes tyre në Superiore ka qenë krejt ndryshe dhe është ajo që i jep Vorës moralin më të madh për sfidën e radhës. Java e 7-të (19 tetor 2025): Elbasani – Vora 1-2.
Një fitore historike e Vorës në “Elbasan Arena”, ku vendësit ishin në avantazh, por Vora përmbysi ndeshjen dhe mori tre pikë me vlera të jashtëzakonshme. Këto statistika e bëjnë prag-ndeshjen edhe më intriguese. Elbasani kërkon të rikthejë dominimin ndaj një rivali që i ka marrë pikë dhe i ka prerë rrugën në momentet vendimtare, ndërsa Vora vjen me moral të lartë dhe me kujtimin e freskët të fitores së madhe të tetorit. Duel që premton luftë, kujdes dhe shumë emocione, ashtu si gjithmonë mes Vorës dhe Elbasanit.
PANORAMASPORT.AL
