Elbasani, sa luftë për një vend në formacion

Elbasani ka mbyllur merkaton me disa lëvizje që synojnë rritjen e konkurrencës dhe zgjerimin e grupit për sezonin 2025-2026.

 Një nga afrimet më të rëndësishme dhe i fundit është mesfushori Isi Manellari, i cili do të shtojë opsione në mesfushë dhe do të krijojë konkurrencë për vend titullari. Duke parë kontingjentin, mund të thuhet se verdheblutë janë me një mesfushë më të fortë, sulm më fleksibël dhe opsione të shumta për rotacion. Trajneri ka në dispozicion një skuadër me konkurrencë të brendshme, duke e bërë çdo pozicion të luajtshëm dhe çdo lojtar të gatshëm për të kontribuar gjatë gjithë sezonit. I vetmi repart që praktikisht nuk ka ndryshuar asgjë është vetëm mbrojta, me titullarët e edicionit të kaluar.

KONKURRENCA – Aktualisht konkurrojnë pesë lojtarë për dy vendet në qendër të mesfushës dhe ardhja e Manellarit do t’i japë trajnerit më shumë alternativa në përzgjedhjen e titullarëve. Ky rotacion është i rëndësishëm për menaxhimin e minutave të lojtarëve gjatë sezonit dhe për të shmangur lodhjen fizike, sidomos gjatë periudhave me ndeshje të shumta. Çdo pozicion në mesfushë është i dubluar, gjë që siguron mbulim të të gjitha roleve kyçe dhe parandalon boshllëqet në rast dëmtimesh ose pezullimesh. Kjo i jep trajnerit mundësi për ndryshime taktike dhe për të përdorur strategji të ndryshme gjatë ndeshjeve. Në sulm, elbasanasit kanë një grup lojtarësh të zgjeruar, me katër sulmues kryesorë dhe pesë të tjerë që mund të luajnë në krahët ose kanë tipare ofensive. Sulmuesit kryesorë ofrojnë mundësi të ndryshme për gol, ndërsa ata që luajnë në krahë mund të hapin hapësira për shokët e skuadrës. Kjo qasje i jep skuadrës mundësinë të ndryshojë ritmin e lojës dhe të reagojë ndaj kundërshtarëve të ndryshëm gjatë kampionatit.

FORMACIONI TIP – Formacioni bazë që përdoret zakonisht është 4-2-3-1, duke krijuar një ekuilibër midis mbrojtjes dhe sulmit. Linjat mbrojtëse dhe mesfusha mbeten të forta, ndërsa sulmi ka opsione të ndryshme për të surprizuar kundërshtarët. Ky formacion është përdorur në dy sfidat e para të këtij edicioni, si dhe në takimet e fundit të vitit të kaluar, çka tregon se trajneri Gvozdenoviç ka të qartë se çfarë kërkon nga skuadra e tij. Ky sezon pritet të jetë sfidues për Elbasanin, pasi konkurrenca për vendin titullari në çdo pozicion është rritur ndjeshëm. Trajneri ka në dispozicion një grup lojtarësh të gatshëm për ndryshime taktike, duke lejuar që ekipi të reagojë ndaj sfidave të ndryshme gjatë kampionatit.

VLADIMIR MEMA-PANORAMASPORT.AL