Deri në 1200 euro dita! Shezlongu sa një natë në hotel me 5 yje, ja sa kushtojnë pushimet në Mesdhe

Pushimet verore në brigjet e Mesdheut, dikur simbol i relaksit dhe qetësisë, sot po shndërrohen në një luks të papërballueshëm. Nga Amalfi e deri në Marbella, çmimet e shezlongëve në plazhet elitare kanë arritur nivele marramendëse, duke e bërë një ditë në bregdet të krahasueshme me një natë në hotelet më luksoze të botës.

Në Spanjë, një nga destinacionet më të frekuentuara është Costa del Sol. Në La Cabane, Marbella, një divan i madh për tre persona arrin deri në 1,200 euro në ditë. Çmimi përfshin vetëm një kupon për shampanjë me vlerë 200 euro, ndërsa çdo shërbim tjetër paguhet veç. Në bregdetin italian të Amalfit, situata është edhe më ekstreme. Në Arienzo Beach Club, Positano, dy shezlongë dhe një ombrellë kushtojnë deri në 600 euro gjatë fundjavës, ndërsa në La Scogliera çmimet arrijnë deri në 848 euro për një ditë, pa përfshirë ushqim apo pije.

Destinacionet e tjera mesdhetare po ndjekin të njëjtën prirje. Në Costa Smeralda të Sardenjës, shezlongët në Nikki Beach shkojnë deri në 400 euro, ndërsa në Mallorca pushuesit paguajnë nga 340 deri në 700 euro, varësisht nga klubi i plazhit që zgjedhin. Në Ibiza, një shezlong në Atzaro Beach, Cala Nova, kushton 350 euro, ndërsa në Cote d’Azur dhe Monako çmimet variojnë nga 250 deri në 350 euro për një ditë.

Një raport i organizatës italiane Altroconsumo thekson se brenda katër viteve të fundit, çmimi mesatar për dy shezlongë me ombrellë në bregdetin italian është rritur nga 180 në 210 euro në ditë. Ky trend ka sjellë pakënaqësi të thella tek pushuesit dhe ka shtuar ndjeshëm ndarjen sociale midis atyre që mund t’i përballojnë këto çmime dhe shumicës së familjeve që jo.

Presidenti i Sindikatës së Resorteve Plazhore, Antonio Capacchione, shprehet se rritja e vazhdueshme e kostos ka pasoja të rënda: “Edhe me dy paga në familje, shumë italianë nuk arrijnë më të përballojnë pushimet. Shpenzimet për plazh dhe argëtim janë të parat që priten.”

Në këtë klimë të re, plazhet e Mesdheut po kthehen gjithnjë e më shumë në hapësira të rezervuara vetëm për një pakicë të pasurish. Ndërkohë, shumica e pushuesve po orientohen drejt plazheve publike ose rajoneve më pak të njohura, ku ende mund të gjejnë çmime më të arsyeshme. Megjithatë, duket se verërat e ardhshme do të jenë gjithnjë e më të shtrenjta dhe më pak të arritshme për pjesën më të madhe të qytetarëve.