ElbasaniPlus Lajmet më të fundit nga Elbasani dhe jo vetëm.
Ristrukturimi i administratave vendore ka hyrë në një fazë intensive pas urdhrit të kryeministrit Edi Rama për rifreskimin e stafit drejtues në nivel bashkish.
Gjatë paradites së kësaj të marte, në Bashkinë Belsh kanë dhënë dorëheqjen një sërë administratorësh dhe drejtorësh lokalë, duke i hapur rrugë përzgjedhjes së drejtuesve të rinj mbi bazën e meritës dhe performancës. Një situatë e ngjashme është regjistruar edhe në Bashkinë Prrenjas, ku tre administratorë janë larguar nga detyra që një ditë më parë, ndërkohë që vijon vlerësimi i drejtorëve që ende mbeten në detyrë.
Procesi i dorëheqjeve dhe rivlerësimeve po zhvillohet gjithashtu edhe në bashkitë Peqin, Cërrik dhe Gramsh, ndërsa në Librazhd dhe Elbasan vala e largimeve ka nisur që prej ditës së hënë.
Ky ristrukturim pritet të shtrihet edhe më tej, si pjesë e një reforme që synon rritjen e cilësisë së shërbimeve publike dhe forcimin e përgjegjshmërisë në nivel vendor.
Qeveria ka paralajmëruar se përzgjedhja e drejtuesve të rinj do të jetë më transparente dhe me fokus tek qytetari, duke i dhënë fund, sipas saj, “automatikës së zyrave” dhe duke e kthyer administratën vendore në një pikë reale shërbimi për publikun.
Ndërkohë, në disa bashki të Qarkut Elbasan ka ende drejtues që nuk e kanë paraqitur dorëheqjen, por pritet që procesi të vijojë në ditët në vijim./gazeta shqip
