Vëzhgim/ Elbasani i Gvozdenoviçit për “Final 4”, Tirana për të Parën

Elbasani beson më shumë se kurrë tek arritja e “Final 4” katër javë nga fundi. Edhe pse duket një sipërmarrje e vështirë, sepse diferenca me Partizanin është katër pikë, në kampin verdheblu nuk janë dorëzuar. Synimi është që deri në përballjen e fundit mes tyre, diferenca të shkojë së paku në tri pikë, në mënyrë që të kenë shansin në sfidën direkte për ta mundur, pasi edhe me pikë të barabarta janë të besuarit e Gvozdenoviç që marrin këtë pozicion, sepse janë në avantazh në ndeshjet e tyre direkte.

Për këtë arsye, elbasanasit duan që së paku të rikuperojnë një pikë ndaj të kuqve në tri sfidat e ardhshme. Një objektiv i arritshëm duke parë edhe ecurinë e javëve të fundit. Gjithsesi, fillimisht verdheblutë duhet të kalojnë pengesat e tyre që kanë rrugës, sepse nuk kanë ndeshje të lehta. E para që duhet të kalojnë me sukses është ajo ndaj kampionëve të Egnatias këtë të hënë në fushën e këtyre të fundit.

ECURIA E GVOZDENOVIÇ – Elbasani si skuadër ndodhet katër pikë larg Partizanit, por vetë trajneri Ivan Gvozdenoviç e ka “futur” skuadrën në “Final 4”. Sipas një vëzhgimi të bërë nga “Panorama Sport”, serbi i pankinës elbasanase ka rivalizuar me ekipet e kreut dhe ka marrë pikët që i duhen për të qenë në katërshe. Më konkretisht, Gvozdenoviç e ka marrë drejtimin e skuadrës para ndeshjes me Vllazninë në “Loro Boriçi”, ku dolën të mundur. Nga ajo kohë dhe deri te fitorja e Elbasanit ndaj Tiranës janë zhvilluar 16 ndeshje në kampionat dhe Elbasani ka grumbulluar 22 pikë.

Nëse marrim renditjen e vetëm këtyre javëve që Gvozdenoviç ka marrë drejtimin e skuadrës, Elbasani e ka kapur zonën “Euro”. Më konkretisht, tri vendet e para nuk ndryshojnë me renditjen aktuale, teksa udhëheq Egnatia me 31 pikë, Dinamo dhe Vllaznia me 27 pikë dhe më pas Elbasani me 22.