ElbasaniPlus Lajmet më të fundit nga Elbasani dhe jo vetëm.
Mashtrimet janë mjaft të përhapura në internet. E keni parë adresën tuaj të e-mail-it. Vijnë me dhjetëra oferta joshëse. Por kujdes! Janë mashtrime.
Kamber Dervishaj ka paguar plot 20 mijë euro, pasi persona të ndryshëm e kanë kontaktuar në rrjete sociale me qëllim për t’i dhuruar një shumë prej 720 mijë eurosh.
Personat që qëndronin pas kompjuterit apo pas telefonit hiqeshin si një qytetare franceze, e cila pretendonte se ishte në ditët e fundit të jetës dhe donte të dhuronte këtë shumë prej 720 mijë eurosh.
Nga kjo shumë, një pjesë ishte për kishat, xhaminë dhe, pjesa tjetër për qytetarët. Ajo i ka shkruar vlonjatit se donte t’i dhuronte 370 mijë euro dhe këtu filloi historia e mashtrimit. Por, për të disbursuar këtë shumë, ai ka paguar plot 20 mijë euro, megjithëse nuk e mori kurrë shumën që iu premtua.
Në redaksinë e emisionit “Fiks Fare” u ankua Kamber Dervishaj, i cili ka treguar të gjithë historinë e mashtrimit. Ai ka në telefonin e tij një mori dokumentesh dhe një mori komunikimesh nëpërmjet Facebook dhe Whatsapp me numra të ndryshëm, të cilat iu hoqën njëherë si donatorja dhe herë të tjera si përfaqësuesit ligjorë të donatores.
Fillimisht, Kamberit i ka shkruar donatorja, e cila i është hequr si e sëmurë rëndë dhe i kishte mbetur edhe pak ditë jetë. Më pas, ajo i ka thënë se disponon pasuri të shumta, pasi kanë pasur biznese në të gjithë botën. Por, këto para’ donte që t’i dhuronte për ata që kishin nevojë. Kemberi thotë se pas këtyre komunikimeve, donatorja e lidhi me një avokat. Dhe, këtu ka filluar historia e mashtrimit.
Avokati i përpiloi një dokument, në formën e një kontrate, ku dhurues ishte Leonarda Josefina Maria Zeegers dhe banuese në Francë, e cila donte t’i dhuronte Kamber Dervishajt shumën prej 720 mijë eurosh. “Zonja Leonarda Josefina Maria Zeegers, për shkak të përkeqësimit të shëndetit të saj javët e fundit, zëvendësohet nga Maitre Thomas Olivier, për t’iu përgjigjur çdo pyetjeje në lidhje me këto fonde. Kostoja totale e këtij dokumenti dhurimi është 360 euro dhe do të përballohet nga përfituesi Kamber Dervishaj” thuhet në dokument.
Më pas, Dervishaj e ka paguar këtë shumë dhe ka pritur pasurinë. Por, më pas i kërkuan 720 euro me qëllim disbursimin e të gjithë shumës.
“Pasi e pagova dhe këtë shumë, kërkesat vijuan që duhet një shumë prej 4000 eurosh si taksë. Madje, duheshin shuma të tjera për lëvrime, taksash në bankë etj” thotë Dervishaj, i cili pohon se, nga pagesa e parë deri te ajo e fundit, ai ka paguar plot 20 mijë euro. “Disa i kam marrë borxh, kam pasur edhe bashkëshorten e sëmurë. Por, si mora kurrë ato para… Kam gjetur se disa persona ishin në Francë, paratë i kam dërguar në emra të ndryshëm. Kam gjetur se vendi i numri të telefonit ka qenë në Nigeri, Afrikë”, thotë Dervishaj.
Pensionisti ka në telefon çdo bisedë me personat që ka folur, ndërsa kërkon edhe ndihmën e organeve ligjzbatuese për të zbuluar këtë rrjet. Sipas tij, mashtrimin e ka kuptuar në momentin që u ka kërkuar një shumë për të kuruar bashkëshorten, shumë e cila nuk i shkoi kurrë. Por, në vend të këtyre, ai ka paguar plot 20 mijë euro, dhe të gjitha i ka me faturat nga pikat e transfertave të parave dhe në banka.
Megjithatë, për ekspertin Tomi Kallanxhi, këto skema janë vetëm mashtrim. “Probabiliteti që ju të fitoni këto shuma është 1 në 7 miliardë. Nuk del dikush në një ditë të bukur dhe ju dhuron 720 mijë euro. Këto mashtrime bëhen kryesisht nga vendet afrikane, ku fare mirë mund të bësh një kartë identiteti false dhe të tërheqësh këto para”, thotë Kallanxhi, ndërsa saktëson se paratë mund të gjurmohen, pasi çdo pikë e transfertave të parave ka kamera.