ElbasaniPlus Lajmet më të fundit nga Elbasani dhe jo vetëm.
Fushata “RedforKids”, e iniciuar nga “Vodafone Albania”, në muajin e parë të pandemisë COVID-19, me dhurimin e 5,000 tabletave e celularëve të parë, po vijon misionin, për t’u mundësuar fëmijëve të familjeve në nevojë, në të gjithë Shqipërinë, edhe më shumë akses, në sistemin e mësimit online. Në eventin “Digjitalizim, për më shumë akses në arsim”, organizuar në shkollën 9-vjeçare “Kus”, Kashar në Tiranë, në një prej shkollave të përfshira në listën e përfituesve të kësaj iniciative, u prezantua dhurimi i 10,000 pajisjeve të tjera smart me qëllimin që askush të mos mbetet mbrapa në procesin mësimor.
15,000 pajisje smart është totali i kontributit të Vodafone në kuadër të “RedforKids”, një dhurim ky nga më të rëndësishmit për sistemin arsimor në këto kohë të vështira për vendin.
Të pranishëm në këtë event ishin ministrja e Arsimit, Sportit dhe Rinisë, Evis Kushi, Drejtori i Përgjithshëm i Vodafone Albania, Achilleas Kanaris dhe Drejtoresha e AKSH-it, Mirlinda Karçanaj, si përfaqësues e mbështetës të këtij procesi digjitalizimi në sistemin arsimor në Shqipëri.
Ministrja Kushi theksoi rëndësinë e qasjes së internetit dhe teknologjisë sidomos në momente të tilla. “Gjej rastin vërtetë që ta falënderoj shumë përzemërsisht Vodafone Albania, sepse këto tableta do t’i ndihmojnë jashtëzakonisht shumë edhe nxënësit, por edhe mësuesit për ta zhvilluar dhe garantuar mbarëvajtjen e procesit mësimor”- tha Kushi.
Kushi tha se gjatë pandemisë të gjithë janë përballur me sfida të panjohura më parë. “Që në ditët e para të marrjes së detyrës, kam qenë në terren dhe mund të them se jam e kënaqur me ndërgjegjësimin e lartë të nxënësve, mësuesve dhe prindërve. Në këtë përpjekje të madhe, e them me krenari që nuk jemi vetëm. Kemi në krah shumë partnerë tanët, donatorë, biznese të ndryshme, të cilët e kanë në ADN-në e tyre përgjegjësinë sociale. Që në fillim të pandemisë, Vodafone Albania ka ofruar 5,000 pajisje digjitale për nxënësit që vijnë nga familje në nevojë, të cilët e kishin të pamundur të ndiqnin mësimin online. Ka qenë një ndihmë e jashtëzakonshme dhe mua më vjen mirë që sot e dyfishojnë mbështetjen”, u shpreh Kushi.
Drejtoresha e AKSH-it, Mirlinda Karçanaj theksoi se e-Albania ka ngritur një seksion të plotë për arsimin, që nis me aplikimin online për fondin e ekselencës, aplikimin në Maturën Shtetërore, regjistrime në shkollat profesionale, vërtetimin dhe njësimin e diplomave, etj.
“Në bashkëpunim me MASR, me nisjen e semestrit të dytë mësimor, do të vijmë me një zgjidhje të madhe për cilësinë e arsimit shqiptar! Do të krijojmë dërrasën e zezë elektronike, një “dashboard”, ku nxënësit e gjithë parashkollorit dhe gjimnazit, të shohin në kohë reale rezultatet e tyre, të printojnë dëftesat me vulë elektronike, apo prindërit të cilët njihen me ecurinë e fëmijëve përmes një sistemi online pa qenë nevoja për “mbledhje me prindër”. E kemi gati për implementim dhe në javët në vazhdim do ta prezantojmë me detaje, edhe përpara jush”, tha Karçanaj.
15,000 aparatet smart, po shpërndahen nga MASR për fëmijët e familjeve në nevojë e për nxënës të klasave kolektive, të identifikuara në disa zona të Shqipërisë, me qëllim që askush të mos mbetet larg orëve të mësimit./atsh