ElbasaniPlus Lajmet më të fundit nga Elbasani dhe jo vetëm.
Teatri “Skampa” në Elbasan sjell për fëmijët shfaqjen e re “Parku Magjik”, e cila do të luhet më 31 Janar dhe 1 Shkurt, me dy seanca në oraret 10:30 dhe 11:00.
Historia zhvillohet në një park të vjetër, i harruar nga të rriturit, por i mbushur me imagjinatën dhe ëndrrat e fëmijëve. Kur errësira bie, parku shndërrohet në një vend të magjishëm ku lodrat flasin, kafshët këndojnë dhe çdo dëshirë e mirë mund të marrë formë.
Katër personazhe kryesore – një roje lozonjare, një magjistar paksa i hutuar, një kafshë që flet dhe një klloun i zemërmirë – kujdesen që fëmijët të mos humbasin imagjinatën, miqësinë dhe besimin tek e mira. Kur magjia e parkut fillon të zhduket për shkak të harresës së fëmijëve për të luajtur dhe ëndërruar, ata bashkojnë forcat për ta shpëtuar atë.
Shfaqja transmeton mesazhe mbi bashkëpunimin, dashurinë dhe sinqeritetin, duke treguar se magjia nuk ekziston vetëm në park, por edhe brenda secilit prej nesh.
“Parku Magjik” është një histori plot humor dhe emocione, e cila synon të angazhojë dhe frymëzojë fëmijët dhe familjet që të ruajnë imagjinatën dhe vlerat e mira.
