ElbasaniPlus Lajmet më të fundit nga Elbasani dhe jo vetëm.
Fakulteti i Shkencave të Edukimit në Universitetin e Elbasanit “Aleksandër Xhuvani” mbajti me sukses Konferencën e 4-të Ndërkombëtare me temë “Globalizimi dhe Integrimi në Edukimin Bashkëkohor”, duke mbledhur studiues, pedagogë dhe profesionistë të fushës së edukimit nga Shqipëria dhe vende të ndryshme të botës.
Në fjalën e tij përshëndetëse Zëvendësrektori i Universitetit, Prof. dr. Skender Topi, shprehu vlerësimin për angazhimin e personelit akademik dhe bashkëpunëtorëve ndërkombëtarë, duke theksuar rëndësinë e dialogut shkencor dhe shkëmbimit të praktikave bashkëkohore që kontribuojnë në përmirësimin e cilësisë së arsimit.
Gjatë aktivitetit u prezantua edhe libri “E drejta eklesiastike dhe liria fetare” i profesorit të nderuar Prof. Gaetano Damaco, një botim me rëndësi të veçantë në fushën e marrëdhënieve ndërmjet institucioneve fetare dhe të drejtës, i cili u prit me interes nga pjesëmarrësit.
Konferenca u shoqërua me sesione shkencore, diskutime dhe prezantime studimore që pasqyruan sfidat dhe zhvillimet më të fundit në edukimin bashkëkohor në një botë në vazhdimësi të globalizuar.
