ElbasaniPlus Lajmet më të fundit nga Elbasani dhe jo vetëm.
Diten e sotme, nën drejtimin e Prefektit të Qarkut Elbasan, Z. Ilir BEJTJA, u organizua mbledhja e Komisionit të Mbrojtjes Civile, me qëllim analizimin e punës së bërë deri tani dhe shqyrtimin e masave të marra nga strukturat përgjegjëse për parandalimin, përballimin dhe minimizimin e dëmeve nga situatat e mundshme emergjente që mund të krijohen gjatë sezonit vjeshtë-dimër 2025-2026.
Në këtë takim morën pjesë të gjithë anëtarët e Komisionit të Mbrojtjes Civile të Qarkut Elbasan.
Prefekti, në fjalën e tij, vlerësoi punën e palodhur të forcave zjarrfikëse, përkushtimin dhe sakrificën e treguar në izolimin dhe fikjen e vatrave të zjarrit, duke theksuar se, falë bashkëpunimit ndërinstitucional dhe përmirësimit të skemës së lajmërimit në kohë, janë bërë hapa të rëndësishëm për rritjen e efikasitetit në menaxhimin e emergjencave.
Gjatë mbledhjes, drejtuesit e institucioneve pjesëmarrëse diskutuan mbi organizimin, koordinimin dhe bashkëveprimin ndërinstitucional për planifikimin dhe përballimin e situatave emergjente të mundshme. Roli i strukturave përgjegjëse në nivel vendor u cilësua si parësor dhe njëherazi vendimtar për menaxhimin efektiv të emergjencave.
Institucioni i Prefektit të Qarkut Elbasan thekson se emergjencat civile janë një fushë prioritare e punës dhe garanton angazhim maksimal për marrjen e të gjitha masave për aktivizimin e kapaciteteve logjistike dhe njerëzore, në funksion të minimizimit të rreziqeve potenciale, duke ndjekur me kujdes situatat në terren dhe duke ofruar mbështetje të nevojshme në çdo rast emergjence.
